كەركوكییەکان ڕێچكەی مەردان و داودە ون ناکەن

نەوەكانی كەركوك درێژە بە مەقابێژی دەدەن و ڕێچكەی عەلی مەردان و سڵاح داودە ون ناكەن، بۆ ئەوەی شارەكەیان بەردەوام بە مەقام ناوبانگی هەبێت، لەسەر مەقامەكانی عەلی مەردان، حوسێن عەلی و سڵاح داودە و ماقامبێژانی دیکە وانەی مەقامبێژی دەخوێنن.


سلێمانی پایتەخی ڕۆشنبریی باشوری کوردستانە، دەوترێت کەرکوک'یش پایتەختی مەقامبێژانی باشوری کوردستانە، بەو پێەی هونەرمەندانی كەركوك لە ڕابردوودا بە شێوازێكی تایبەت مەقامیان چڕیووە و نەک لە باشوری کوردستان، بەڵکو لە عێراقیشدا ناوبانگی تایبەتیان هەبووە.

مەقامەكانی قەتار وەیسی، خاوەكەر و هیجرانی، لە میژووی مەقامی هونەری كوردییدا لەلایەن هونەرمەندانی كەركوك مۆركی تایبەتیان لێ دراوە، ئەوەش پاش ئەوەی هونەرمەندانی وەك عەلی مەردان و حوسێن عەلی و سڵاح داودە بە مەقامەكانیان مێژوویەكی گەوەری مەقامیان لە شارەكە بنیادناوە.

بۆ درێژە پێدان بە ڕێكچەی ئەو هونەرمەندانە و بەردەوامی مەقامی ڕەسەنی كوردی لە شارەكە، ناوەندی عەلی مەردان بۆ مەقام خولێكی تایبەتی كردووەتەوە بۆ فێربوونی وتنەوەی مەقام بەشێویەكی ئەكادیمی بۆ پێكهاتەكانی شارەكە.

سیروان عومەر یەكێك لە مامۆستاکانی خولەکەیە و دەڵێت ئامانجیان زیندووكردنەوەی مەقامە ڕەسەنەكانە، بە تایبەتی ئەو مەقامانەی لە كەركوك و ناوچەی گەرمیان وتراون، "ئامانجمانە كۆمەڵێك كەس پێبگەیەنین بۆ ئەوەی لە دواڕۆژدا ببنە مامۆستای مەقامات و ڕێچكەی تایبەتی هونەر لە فەوتان ڕزگار بكەن، کە سەدان ساڵە لە کەرکوکدا بەردەوامیی هەیە".

شێروان كەركوكی فێرخوازێکی خولەکەیە، پێیوایە مەقام هونەرێكی خۆڕسكە لە گیانی هەموو كەركوكیی و گەرمیانییەکدا هەیە، وتیشی:"كەركوك فرە پێكهاتەیە، دیارە عەرەب و توركمانیش لێرەدا بەشدارن بۆ ئەوەی سود لە خولەكە ببین، ئەوانش هاتوون بە شێوازی خۆیان فێری مەقامەكان بن، چونکە مەقامەكان لەم شارە موڵكی گشتی وەرگرتووە، كەسانێك هاتوون لە ڕووە ئاینەكەوە قورئانی پێ بخوێنن".

نورەدین زەنگەنە، بەرپرسی ناوەندی عەلی مەردان بۆ مەقامات، باسی لە گرنگی مەقام لە کەرکوکدا کرد کە هونەرمەندان لە مێژوودا تا ئەمڕۆ هێناویانە، وتیشی: لای ئێمە ئەم شارە پایتەختی مەقاماتە، ئەو مەقامانەی لە كەركوك و گەرمیان هەیە لە شارەكانی تر ناتوانن وەك كەركوك دەریبڕین، یان لە دڵەوە بیڵێنەوە، چونکە مەقام لە كەركوك لە منداڵیەوە لە ناخمان دەڕوێت، ناوچەکان جیاوازن، حەیران، لاوك، سیاچەمانە و هۆری جافی هەیە، بەڵام ئێمە وەك كەركوك مەقامان هەیە.

س.ح