كەركوك، دیداری نەوەكان بۆ شیعر بەڕێوەچوو

لە ژێر ناونیشانی 'دیداری نەوەكان بۆ شیعر'، دیدارێكی شیعری لە كەركوك بەڕێوەچوو كە تێیدا ١٠شاعیر گەنج و بەتەمەن تێیدا بەشداربوون و پێکەوە دوو زەمەنی شیعرییان تێکەڵکرد.


دیداری نەوەكان بۆ شیعر، ناونیشانی ئەو دیدارە شیعریە بوو، كە پاشنیوەڕۆی ئەمڕۆ بۆ ١٠ شاعیری گەنج و بەتەمەن ئەنجامدرا و تێیدا شاعیرانی شارەکانی كەركوك و سلێمانی بەشداربوون.

ئەو دیدارە لە لایەن بەڕێوبەرایەتی ڕۆشنبیری و هونەری كەركوك سەر بە بەڕێوبەرایەتی گشتی ڕۆشنبیری و هونەری سلێمانی وەزارەتی ڕۆشنبیری و لاوان ئەنجامدرا لە ناوەندی دیالۆگ لە باڵەخانەی ئێڵ سی لە شاری كەركوك.

لەو دیدارەدا هەریەكە لە شاعیران (ڕوبار زەنگەنە، ڕێبوار سەراب، ڕەحیم سەرەڕۆ، ئارام پەشێو، بورهان ئەحمەد، ئاوێزان نوری، ڕوزار ئەحمەد، ستار ئەحمەد، محەمەد لوقمان، ژوان كەریم) بە شیعری جۆراوجۆر بەشداربوون.

دیدارەكە بە میوزك و شیعر ئاوێزان بوو و لە كەشێكی شاعیرانەدا هەر دە شاعیر شیعری خۆیان خوێندەوە و بابەتەكان زیاتر خۆی لە شیعری ڕۆمانسی و نیشتیمان پەروەری دەبینییەوە.

ئەوەی لەو دیدارەدا جێیگەی سەرنج بوو نەوەی كۆن و نوێ پێكەوە شیعرەكانیان دا بەگوێی ئامادەبوواندا و سەردەمەكان لەو دیدارەدا تێكەڵ كرابوون، ئەمەش وەك پەیامێك، كە شیعر لەگەڵ هەمو نەوەیەكدا دەمێنێتەوە و زیندوە.

د.ع