لە قەسرێ بە چالاکى هونەریی ڕەخنە لە سیستمی حکومڕانیی گیرا

لە شارەدێی قەسرێ سەربە شارۆچکەی چۆمان چەندین چالاکی هونەرەیی بەڕێوەچوو تێیدا ڕەخنە لە سیستمی حکومڕانی هەرێمی کوردستان گیرا.


کۆمه‌ڵه‌ی هونه‌ری مامه‌ڕووته‌ له‌ قه‌سرێ شەوی ڕابردوو چه‌ندین چالاکی جۆراوجۆریان له‌ بواره‌کانى هونه‌ریی ئه‌نجامدا، که‌پێکهاتبوون لە شانۆ و گۆرانى و دۆکیومێنتاریی.

بڕگه‌کانى شانۆکە گوزارشت بوون له‌ ڕه‌خنه‌گرتن له‌ سیسته‌مى حکومڕانیى و نادادپه‌روه‌رى له‌ هه‌رێمى کوردستان و که‌مته‌رخه‌مى حکومه‌ت له‌ ئه‌داى پرۆژه‌ خزمه‌تگوزاری و هونه‌ری و په‌روه‌رده‌ییه‌کان.

له‌ به‌شێکى دیکەی چالاکیه‌که‌یاندا له‌ لایه‌ن دوو لاوى ناوچه‌که‌ چه‌ندین پارچه‌ گۆرانى فۆلکلۆر و میوزیک پێشکه‌ش به‌ ئاماده‌بووان کران.

ئه‌وه‌ جگه‌ له‌وه‌ى له‌ چالاکیه‌که‌دا به‌شێوه‌ى دۆکیومێنتاریی سروشت و ناوچه‌که‌ که‌ له‌لایه‌ن فۆتۆگرافه‌رانى ناوچه‌که‌ کۆکرابوونه‌وه‌ و خرانه‌ڕوو، له‌گه‌ڵ فیلمێکى کۆمیدى که‌ کۆمه‌ڵه‌که‌ ده‌ریان هێنابوو، هەروەها چالاکیه‌کانى کۆمه‌ڵه‌ى هونه‌رى مامه‌ڕووته‌ کە له‌ ڕابردوودا ئه‌نجامیان دابوون خرانه‌ڕوو.

کۆمه‌ڵه‌ى هونه‌رى مامه‌ڕووته‌، له‌ کۆمه‌ڵێک گه‌نجى به‌هره‌مه‌ندى باڵه‌کایه‌تى و قه‌سرێ پێکهاتوون، که‌ له‌  ٢١ی١٢ی٢٠١١ دامه‌زراوه،‌ وه‌ک خۆیان ده‌ڵێن سه‌ر به ‌هیچ حزب و لایه‌نێک نین، بۆیه‌ش تا ئێستا له‌سه‌ر ئه‌رک و گیرفانى خۆیان چالاکى ده‌که‌ن و هیچ لایه‌ک ئاوڕى لێ نه‌داونه‌ته‌وه.

ک.ک