لە کەرکوک گروپێك بە هونەری هەڵپەڕکێ کلتوری کوردی دەپارێزێت

گروپی هەڵپەڕكێی نەورۆز، کە پێکدێن لە کۆمەڵیک ژن و پیاوی گەنج ماوەی ١٥ ساڵە لە شاری کەرکوک چالاکە و بە هونەری هەڵپەڕکێ دەیەوێت کلتوری کوردی بپارێزێت، بەرپرسی گروپەكەش هێما بۆ ئەوە دەكات سەرەڕای هاوکاری نەکردنیان لە لایەن حکومەتەوە گروپەكەیان بۆتە قوتابخانە بۆ پێگەیاندنی چەندین گروپی تری هەڵپەڕكێ.


گروپی هەڵپەڕكێی نەورۆز، گروپێکی سەربەخۆیە و لە شاری كەركوك، لە ساڵی ٢٠٠٤ەوە دامەزراوە و تا ئێستا بێ دابڕان بەردەوامە لە كارەكانی و تا ئێستا چەندین نمایشیان ئەنجامداوە و لە چەندین فیستیڤاڵ و پێشبڕكێدا پلەی یەكەمیان بەدەستهێناوە.

گرووپی هەڵپەڕكێی نەورۆز، پێکدێت لە ۱٨ ژن و پیاو لە نمایشەکاندا ٨ بۆ ۱۲ کەس بەشدار دەبن، لە بارەی گروپەکەیانەوە بەختیار ماجید، سەرپەرشیتار و بەرپرسی گروپی هەڵپەڕكێی نەورۆز بۆ ڕۆژنیوز قسەی کرد و وتی: "لە ساڵی ٢٠٠٤، ساڵێك دوای پرۆسەی ئازادی عێراق ئەم گروپە لە شاری كەركوك دامەزراندنی خۆی ڕاگەیاند، ئەوكات وەك كۆمەڵێك گەنج پێمان باش بوو كە ئەم شارە لە ڕووی هونەرییەوە پێش بخەین و هەوڵەكانمان چڕ بكەینەوە بۆ ڕێگریكردن و لە ناوچوونی كلتوری كوردی، چونكە كۆی گشتی هونەری كوردی لە شاری كەركوك لە ناوچووبوو، حكومەتی بەعسیش هەوڵەكانی چڕكردبووە بۆ لە ناوبردنی كلتوری كوردی لەم شارە".

باسی لەوەشکرد کە سەرەتا ئەو ئەندام بووە لە گروپەكەدا و کەسێکی دیکە بەناوی دانا ڕاهێنەر و سەرپەشتیاری گروپەكە بووە، "لە پاش وازهێنانی ئەو من بووم بە سەرپەشتیار و ڕاهێنەر و سەرپەرشتیار، گروپەکە لە شاری كەركوك بووە بە قوتابخانەیەك بۆ ئەو کەسانەی کە ئارەزووی هەڵپەڕكێی فۆلكۆری كوردی دەكەن، هەر لەم گروپەوە چەندین گروپی دیکە دروست بووە و ئێستا لە كەركوك هەن و كار و چالاكی باشیان هەیە".

بەرپرسی گروپی هەڵپەڕكێی نەورۆز، لەسەر گرنگی هونەری هەڵپەڕکێی فۆلکلۆریی قسەی زیاتری کرد و ئاماژەی بۆ ئەوەکرد "وەك چۆن لە دونیادا هەر وڵاتێك جۆرە هونەرێكی هەیە بۆ دەربڕین و گوزارشت كردن لە دڵخۆشی لە ناو كوردیشیدا هەڵپەڕكێ هونەری دەربڕینی دڵخۆشییە، ئێمە هەمیشە هەوڵمان داوە كار بكەین بۆ پاراستنی كلتور فۆلكۆری هەڵپەڕكی كوردی، هەروەها دەمانەوێت بەم هونەرە ڕێگربین لە خزاندنی چەند هونەرێكی بیانی بۆ ناو هونەری كوردی وەكو ڕاپ و هیپۆپ".

 ئەوەشیخستەڕوو "گروپەكە لە ماوەی تەمەنیدا چەندین جار لە فیستیڤاڵ و پێشبڕكێی هونەری پلەی یەكەمی بەدەستهێناوە هەروەها پلەی زۆر باشەمان وەرگرتووە، بۆیە ئامانج لە گروپەكەمان پاراستنی هونەری كوردییە، گروپەكە پێشتر هیچ ئەندامێكی كچی تێدا نەبوو بەڵام خۆشبەختانە ئێستا چەند ئەندامێكی كچ لە گروپەكە بونیان هەیە و لە زۆربەی نمایشەكان زیاتر لە دە كەس نمایش دەكەن، بۆیە ئێستا لە نمایشەكاندا كچانی شارەكەش بەشدارن".

بەرپرسی گروپی هەڵپەڕكێی نەورۆز، لە کۆتایشدا باسی لە ئاستەنگەکانی بەردەم گروپەکەیان کرد و وتی: یەکێک لە ئاستەنگەکان ئەوەیە کە هیچ لایەنێک هاوکارنیە بۆ دابین کردنی جلوبەرگی کوردی بۆ نمایش، یەکێکی دیکەش لە ئاستەنگەکان ئەوەیە بەهۆی ڕێگرییە کلتورییەکان بەشێک لەو ژنانەی پەیوەندیان پێوەدەکات زوو دادەبڕێن و لە گروپەکەدا نامێننەوە.

ک.س