نەبوونی هۆڵی شانۆ گلەیی هونەرمەندانی سەیدسادقی لێدەكەوێتەوە

هونەرمەندان و شانۆكاران و گەنجانی شارۆچکەی سەیدسادق، ڕەخنە لە نەبوونی هۆڵی شانۆیی لە سنوری شارۆچکەکەیان دەگرن و ڕایدەگەیەنن، کە "لەگەڵ ئەوەی چالاكی هونەریی زۆرباش لەناوچەكەماندا هەیە، تائێستا حكومەتی هەرێم نەیتوانیوە هۆڵێكی شایستەمان بۆ دروست بكات".  


سەبارەت بەنەبوونی هۆڵی شانۆیی لەشارۆچكەی سەیدسادق هونەرمەندان و شانۆكاران و گەنجان گلەیی و ڕەخنەكانیان لەڕێگەی ڕۆژنیوزەوە ئاراستەی حکومەت و لایەنە پەیوەندیدارەکان دەکەن.

یاسین سەعید، سەرۆكی تیپی شانۆی نالی لەشارۆچكەی سەیدسادق، ڕونیکردەوە کە "یەكێك لەكێشە سەرەكییەكانی هونەرمەندان لەشارۆچكەکەیاندا نەبوونی هۆڵی شانۆییە، ماوەی ٢٧ ساڵە هاوار لەدەسەڵات دەكەین بۆ دابینكردنی هۆڵی شانۆیی، بەڵام دەسەڵات وەڵاممان ناداتەوە".

وتیشی: "ئێمەی هونەرمەندان پێویستمان بەكۆڕ و سیمینار و هۆڵی شانۆییە، لەساڵانی هەشتاكانەوە چالاكی هونەریی زۆرباش لەناوچەكەماندا هەیە، تائێستا حكومەت نەیتوانیوە هۆڵێكی شایستەمان بۆ دروست بكات، هونەرمەندان لەڕوویان بێت نمایشی شانۆی تێدا بكەن".

سەرۆكی تیپی شانۆی نالی، باسی لەوەشكرد، کە نەبوونی هۆڵ كێشەی تەواوی بۆ ئێمەی هونەرمەندانی سنورەكە دروستكردوە، ساڵانە بمانەوێت ئیشێكی هونەریی ئەنجامبدەین، تاوەكو خۆمان دەگونجێنین لەگەڵ ئەو هۆڵە ناجۆرە خراپانەی هەیە زۆر ناڕەحەتمان دەكات و بەناچاری چالاكیەكەی تێدا دەكەین.

جەختیشیکردەوە کە سەیدسادق یەكێكە لەو شارانەی تایبەتمەندییەكی جیاوازی هەیە، لەڕووی بەڕێوەبردنی كاروبارە هونەرییەكانەوە، "بەردەوام چالاكی و جوڵەی هونەری تێدایە، بەڵام نەبوونی شوێن و هۆڵی شانۆیی وایكردوە ئەو گەنجانەی بیانەوێت گروپێكی شانۆیی دابمەزرینن، كاتێك دەزانن هۆڵێك نیە بەناچاری پەشیمان دەبنەوە لەكارە هونەرییەكە".

ئاماژەی بۆ ئەوەشکرد کە ژنان و كچان ڕۆڵێکی بەرچاویان لە بەشداریكردنی چالاکییە هونەرییەکانی شارۆچکەی سەیدسادقدا هەیە و بەردەوام لەنمایشە شانۆییەكاندا كچ بوونی هەیە، ئەگەر هۆڵی شانۆیی هەبێت قۆناغێكی باشمان بڕیووە لەڕووی نەریتە كۆمەڵایەتیەكانەوە، بۆ نموونە ئەگەر لەساڵانی ڕابردوودا بەشداریی ژنان لەگروپەكانی هەڵپەڕكێ و شانۆییەكاندا شتێكی بڤە بوایە، ئەوا لەدوای پرۆسەی ئازادی عێراقەوە لەسەیدسادق برەوی باشی سەندوە و ژنان كێشەیان نیە لەڕووی بەشداریكردن لە بوارەكەدا.

ساریسا دڵشاد، كچە خوێندكارێكی گەنجی شارۆچكەی سەیدسادق، وتی "وەك شارو شارۆچكەكانی دیكەی كوردستان سەیدسادقیش كێشەی نەبوونی هۆڵ و شوێنی شانۆیمان هەیە بۆ ئەنجامدانی كاری هونەری".

وتیشی: وەك گەنجێك كۆمەڵێك حەزو خولیام هەیە یەكێكیش لەوانە كاری شانۆییە، بەڵام بەهۆی نەبوونی هۆڵی شانۆییەوە ناتوانین زیاتر بەشداری بكەین لەكارە هونەرییەكاندا، ئەوەش جێگەی داخە بۆ ئێمە لەشارۆچكەیەكی وەك سەیدسادقدا شوێنێك یان هۆڵێك نیە تواناكانی خۆمانی تێدا نیشان بدەین.

ئەو خوێندکارە ڕەخنەی زیاتری لە حکومەت گرت و وتی: "هەرچەندە دەزانین حكومەت دەتوانێت هۆڵێكی شانۆیی و هونەری لەشارەكەماندا بكاتەوە، بەڵام خۆیان كەڕو كوێر دەكەن لەئاست ئەو داواكاریانەی ئێمەی گەنجاندا، وەك گەنجان داواكاریمان لە لایەنی پەیوەندیدارو حكومەت ئەوەیە شوێنێكی گونجاومان بۆ دابین بكەن".

ئەو كچە خوێندكارە پەیامیشی هەبوو بۆ ژنانی شارەكەی و وتی: دواكارم ژنانی شارەكەم هەر تواناو بەهرەیەكیان هەیە، چ لەكاری دەستی بێت یان هونەری و هەر بوارێكی دیكە بێت، لەماڵەوە نەمێنەوە بێنەدەرەوە تواناكانی خۆیان دەربخەن و پێویستە ئەو ڕێگریانەی لەژنان دەكرێت بۆ بەشداریكردن لە كایە هونەرییەكاندا نەمێنێت.

ک.س