هونەرمەندانی کورد لە سوید کۆنسێرتی یەکێتی نەتەوەییان سازکرد

هونەرمەندانی چوارپارچەی کوردستان لە ستۆکهۆڵمی پایتەختی سوید کۆنسێرتێکی گەورەیان بۆ پێشخستنی پرسی یەکێتی نەتەوەیی ئەنجامدا و داوای یەکێتی نەتەوەییشیان لە هێزە کوردییەکان کرد.


ئێوارەی دوێنێ لە ستۆکهۆڵمی پایتەختی سوید هونەرمەندانی چوارپارچەی کوردستان، دووەمین کۆنسێرتی یەکێتی نەتەوەییان سازکرد.

لە کۆنسێرتەکەدا کوردانی تاراوگە، نوێنەری پارتە سیاسییەکان و دۆستانی کورد و هەروەها هاوسەرۆکانی کەنەکە ئامادەبوون، کۆنسێرتەکە بە دەقەیەک ڕێزگرتن لە شەهیدانی ڕێگای ئازادی کوردستان و سرودی نەتەوەیی ئەی ڕەقیب دەستیپێکرد.

هونەرمەندان؛ خەلیل خەمگین، دیار دێرسیم، ناهیدە هەورامی، ئایفەر دوزداش، هۆشیار حەمە فەرج، حەسەن شەریف، محەمەد تەها ئاکرەیی، نارین فەقێ، نەجمەدین غوڵامی و چەندین هونەرمەندی دیکە بەشداری کۆنسێرتەکە بوون و گۆرانییە فلکلورە کوردییەکان، گۆرانی نەتەوەیی و سرودیان لەسەر تێکۆشانی ئازادیخوازیی کورد لە چوارپارچەی کوردستان پێشکەشکرد.

هونەرمەندان لەگەڵ پێشکەشکردنی گۆرانیی و سرودەکانیان، ڕەخنەشیان لە هێزە سیاسییەکانی کورد گرت کە لەم قۆناغە گرنگە مێژووییەدا، یەکناگرن و بۆ پاراستنی بەرژەوەندیی هاوبەشی کورد کۆنابنەوە، هونەرمەندان هەروەها ڕایانگەیاند؛ دەیانەوێت بەم چالاکییە هونەرییانە سەرنجی کورد بیهێننە سەر گرنگی یەکێتی نەتەوەیی و فشار بخەنە سەر هێزە کوردییەکان بۆ ئەوەی بەرەو یەکێتی نەتەوەیی هەنگاوی پێویست بنێن، داواشیان لە گەلی کورد و لایەنگرانی پارتە سیاسییەکان کرد کە فشار بخەنە سەر هێزە سیاسییەکان بۆ ئەم کارە.

هونەرمەندان پرسیاریان لە هێزە سیاسییەکان کرد کە؛ چ ئاستتەنگییەکتان لە بەردەمدایە کە ناتوانن بۆ بەرژەوەندیی هاوبەشی کورد و کوردستان کۆببنەوە؟

لە کۆتایی کۆنسێرتەکەش زەینەب موراد و ئەحمەد کاراموش هاوسەرۆکانی کەنەکە قسەیان کرد و باسی گرنگی یەکێتی نەتەوەیی و هەوڵدانی هونەرمەندانیان لەو باریەوە کرد، دوای ئەوەش سوپاسنامەیان پێشکەشی هونەرمەندان کرد.

پاشان کۆنسێرتەکە بە پێشکەشکردنی گۆرانییەکی هاوبەشی هونەرمەندان کۆتاییهات.

دەستپێشخەری هونەرمەندانی کورد لە دەرەوەی وڵات خۆیان ئامادە دەکەن، دوای نەورۆزی ٢٠٢٠ لە باشور و ڕۆژئاوای کوردستان کۆنسێرت ئەنجامبدەن، لەو چوارچێوەیەدا، هونەرمەند خەلیل خەمگین ڕایگەیاند: لە مانگی نیساندا دێنە کوردستان و کارو خەباتیان دێننە ناو وڵات.

ک.س