هەولێر، هونەرمەندانی چوار پارچەی كوردستان پێشانگایەكی كاری دەستییان كردەوە

٢٠ هونەرمەندی دەستڕەنگین لە بواری كاری دەستیدا كە لە هەرچوار پارچەی كوردستانەوە بەشدارییان کردووە، لە شاری هەولێر پێشانگایەكی هاوبەشی كارە دەستیەكانیان کردەوە.


بەبۆنەی جەژنی ڕەمەزان پێشانگایەکی كاری دەستی بە ناونیشانی ماڵی کوردەواری لە پارکی منارەی شاری هەولێر كرایەوە و پێشانگاکەش ماوەی سێ رۆژ بەردەوام دەبێت.

كەریم شێخانی، سەرپەرشتیاری پێشانگاكە  بە ڕۆژنیوزی وت، پێشانگای كاری دەستی ماڵی كوردەواری بەهاوكاری دەستەی گەشتوگوزار و پارێزگای هەولێر و ئەندازەی پاركەكان كراوەتەوە و ماوەی سێ رۆژ بەردەوام دەبێت.

وتیشی، پێشانگاكە لە دوو بەش پێكهاتووە، بەشێكیان كارە دەستیەكانە كە خەڵكی دەست رەنگین بەشداری تێداكردوە، بەشەكەی تریشی بۆ زیندوكردنەوەی كارە دەستییەکانی باوباپیرانمان و كەلەپووری كوردەوارییە و تێیدا چەندین كەلوپەلی بەكارهاتووی كۆن و كارە دەستییەكانی باوباپیرانمان نمایشكراوە.

ئاماژەی بەوەش كرد، ئەمڕۆ دووەم ڕۆژی پێشانگاكەیە و بیست كەسی دەستڕەنگین بەشداریكردوە، ئەو پێشانگایەش كەمپینینێكە و بەردەوام دەبین، لە داهاتوودا دەچینە زۆربەی شوێنە گەشتوگوزارییەكان و لە پێشانگاكانی داهاتوو ژمارەی بەشداربووان زیاتر دەكەین و هەموو ئەو كەسانەی لە كاری دەستی بەهرەمەندن دەتوانن بەشداری بكەن.

ک.س