چلەی هونەرمەند ئیسماعیل سابوری بەڕێوەچوو

لە شاری سلێمانی چلەی كۆچی دوایی هونەرمەند ئیسماعیل سابوری لە ژێر ناونیشانی(ئیسماعیل سابوری دەنگێك وەك نەسیم) بەڕێوە چوو.


ئێوارەی ئەمڕۆ، لە هۆڵی ڕۆشنبیری شاری سلێمانی، لە لایەن سەندیكای هونەرمەندان و بەڕێوبەرایەتی گشتی ڕۆشنبیری و هونەری سلێمانی، چلەی هونەرمەندی كۆچكردوو ئیسماعیل سابوری بەڕێوەچوو.

مەراسیمەكە بە ئامادەبوونی ژمارەیەكی بەرچاو لە هونەرمەندانی باشوری كوردستان و سەرجەم چین و توێژە جیاوازەكان، ئەنجامدرا، سەرەتای مەراسیمەكە بە خولەكێك ڕێزگرتن لە شەهیدان بەڕێوەچوو دواتر ژمارەیەك مۆم بۆ یادی هونەرمەند داگیرسێندران.

بابەكر دڕەیی بەڕێوبەری گشتی بەڕێوبەرایەتی گشتی ڕۆشنبیری و هونەری سلێمانی وتارێكی پێشكەش كرد و پاشان كورتەیەك لە سەر ژیان و كارە هونەرییەكانی هونەرمەندی كۆچكردوو نمایش كرا.

لە بەشێكی دیكەی مەراسمەكەدا هەروەها چەند گۆرانییەكی ئیسماعیل سابوری لە لایەن هونەرمەند كاروانی نەی پێشكەش كرا.
ئیسماعیل سابوری لە ساڵی ۱۹٥٦لە شاری كرماشان لە ڕۆژهەڵاتی كوردستان و لە ناو بنەماڵەیەكی هونەر پەروەر لە دایكبووە و لە سەرەتای ساڵی ۱۹۷۰ چووەتە ناو دونیای هونەر و خاوەنی ۱۰٥گۆرانی تۆماركراوە.

لە ساڵی ۲۰۰۳ڕووی لە باشوری كوردستان كرد و بۆ ماوەی ۱٥ساڵ لە شاری سلێمانی ژیا.
ڕۆژی ۱٥ی حوزەیرانی ۲۰۱۹بە نەخۆشی كۆچی دوایی كرد.

د.ح