ژنان: بایکۆتکردنی درامای تورکی زیان چەکێکە دژی ئابوری ئەو وڵاتە

ژنان لە گەرمیان بایکۆتی درامای تورکی بە کاریگەر دەزانن بەرامبەر ئابوری تورکیا، هەروەها ئاماژە بە زیانەکانی دەکەن و باس لەوە دەکەن، کە لەو درامایانەدا سوکایەتی بە کورد بەگشتی و ژنان بە تایبەت دەکرێت، ‌دەشڵێن: باشترین کار ئەوەیە بایکۆتی بکەین، چونکە چەندین خێزانیش بەهۆی ئەو درامایانەوە هەڵوەشاونەتەوە.


دژی داگیرکەرییەکانی دەوڵەتی تورک لە ڕۆژئاوا و باشوری کوردستان، بایکۆتی شتومەکی تورکی لە باشوری کوردستان بەردەوامیی هەیە، لەگەڵ ئەمەدا داواکاریی هاوڵاتیان بۆ بایکۆتکردنی دراما تورکییەکان ڕووی لە زیادبوونە، لەو چوارچێوەیەدا ژنان لە گەرمیان بۆ ڕۆژنیوز دەدوێن و پەیامی خۆیان دەگەیەننە هەموو هاوڵاتیان.

هه‌یفا مه‌جید کە پیشەی مامۆستایە، پێیوایە بایکۆتکردنی دراما توركییه‌كان چەکێکی قورسه‌ بۆ لێدانی لە ئابووری تورکیا، دەشڵێت: چونکە ئه‌و وڵاته‌ له‌ڕێگای ئه‌و درامایانه‌وه‌ سه‌رمایەیە‌كی زۆری ده‌ست ده‌كه‌وێت، جیا لەوەش دراما تورکییەکان کاریگەریی خراپی خۆیان هەبووە لەسەر كۆمه‌ڵگای کوردی، بۆیە بایکۆتکردنیان ئەرکێکی ئەخلاقی و نیشتیمانییە، بەتایبەت له‌م كاته‌دا كه ‌توركیا هێرش و داگیركاریی ناڕه‌وا ده‌كاته‌ سه‌ر ڕۆژئاوا.

مامۆستا هەیفا بایکۆتکردنی دراما تورکییەکان بە خاڵێکی بەهێزی مەدەنیی دژی تورکیا دەزانێت، هەروەها دەڵێت:"به‌داخه‌وە بەشێک له‌ كه‌ناڵه‌ كوردییه‌كان بێ هه‌ڵویستن وتا ئێستا ئه‌و درامایانه‌ بڵاو دەکەنەوە، کە ده‌كرێت له‌ جیاتی ئه‌وانە درامای کوردی پەخش بکە، کێشە نییە کە کۆنیش بێت، گرنگ ئەوەیە تورکی بایکۆت بکەن".

هەروەها جیهان محه‌مه‌د به‌ڕێوه‌به‌ری كتێبخانه‌ گشتیه‌كانی گه‌رمیان، بە گرنگی دەزانێت هاوشێوەی هەڵمەتی گەورەی بایکۆتی شتومەکی تورکی، هەڵمەتی بەهێز بۆ بایکۆتی درامای تورکی بەڕێوەببرێت، چونکە "ئه‌و درامایانه‌ به‌شێكی زۆری سوكایه‌تی زۆری تێدایە بەرامبەر هەموو تەمەن و ڕەگەزێک ، بەتایبەتتر ژنان، هەروەها ز زۆرجاریش سوکایەتی بە نه‌ته‌وه‌یه‌كی دیاریكراوی وه‌ك كورد ده‌كات".

جیهان محەمەد، وتیشی: ئەو درامایانه‌ بوونه‌ته‌ هۆکارێک بۆ تێكچوون و لێكجیابونه‌وه‌ی خێزانه‌كان، بۆیه‌ بایكۆتكردنی ئه‌ركێكی پیرۆزه‌ و وا ده‌خوازێت هه‌موومان ئه‌و كه‌ناڵانه‌ بایكۆت بكه‌ین، كه‌ بەردەوام بێت لە پەخشکردنی درامای توركی.

س.ح