کەمپەینێک بۆ بایکۆتکردنی زنجیرە فیلمە تورکییەکان ڕاگەیەندرا

دوو ڕێکخراو لە شاری سلێمانی کەمپەینێکیان بۆ بایکۆتکردنی دراما تورکییەکان ڕاگەیاند، بڕیارە لە چوارچێوەی کەمپەینەکەدا واژۆ دژی دراما تورکییەکان کۆبکرێتەوە و ئاراستەی وەزارەتی ڕۆشنبیریی و پەرلەمانی هەرێمی کوردستان بکرێت.


ئێوارەی ئەمڕۆ لە میانی گردبوونەوەی شاری سلێمانیدا کە بۆ پشتیوانییکردن لە بەرخۆدانی ڕۆژئاوای کوردستان لەدژی داگیرکاریی دەوڵەتی تورک بەڕێوەچوو، هەردوو ڕێکخراوی نوێگەر بۆ گەشەپێدانی هونەریی و موغەکانی زەردەشتی کەمپەینێکیان بۆ بایکۆتکردنی دراما تورکییەکان ڕاگەیاند.

دیاکۆ زەردەشتی، ئەندامی ڕێکخراوی موغەکانی زەردەشتی لە گردبوونەوەکەدا یاداشتی هاوبەشی هەردوو ڕێکخراوەکەی خوێندەوە و تێیدا ڕایگەیاند، کە ئەوان بە دروشمی "منیش بایکۆتی درامای تورکیی دەکەم" کەمپەینێک بۆ بایکۆتکردنی دراما تورکییەکان ڕادەگەیەنن.

داواشی لە هونەرمەند، ڕۆشنبیر، ژنان، گەنجان، ڕۆژنامەنووسان و مامۆستایانی ئاینیی کرد، کە پاڵپشتیی کەمپەینەکە بکەن و بەشداریی تێدا بکەن.

بڕیارە لە ڕۆژانی داهاتوودا لە چوارچێوەی ئەو کەمپەینەدا، دەست بە کۆکردنەوەی واژۆ بکرێت لە شاری سلێمانی، پاشانیش واژۆکان ئاراستەی هەریەکە لە وەزارەتی ڕۆشنبیریی و پەرلەمانی هەرێمی کوردستان بکرێن و داوایان لێبکرێت، کە پەخشکردنی دراما تورکییەکان لە دەزگا ڕاگەیاندنەکانی باشوری کوردستان قەدەغە بکرێن.

ب.ل