گوندێکی ١٠ ماڵیی و  دوو هەزار و ٣٠٠ کتێب

گوند سه‌عداوه‌ ١٠ ماڵی تێدایە،‌ ‌ خه‌ڵکی ئه‌و گونده‌ به‌ ڕۆشنبیریی خۆیان سه‌رنجی ده‌ورووبه‌ریان ڕاده‌کێشن، هۆکاری ئه‌وه ڕۆشنبیریه‌ش هه‌بوونی کتێبخانه‌یه‌كی دوو هەزار و ٣٠٠ کتێبییە.


گوندی سه‌عداوه‌، له‌ڕووی ئیداره‌ییه‌وه‌ سه‌ر به‌ شاره‌دێی سه‌رقه‌ڵای شارۆچكه‌ی كفری – ئیدارەی گەرمیانە، کە له‌ ساڵی ١٩٦٣ له‌لایه‌ن شاعیری ناسراوی گه‌لی كورد شێخ ئه‌حمه‌د شاكه‌لی-یەوە دروستكراوه‌، گوندەکە ئێستا لە ١٠ماڵ پێکدێت و ئەندامانی خێزانەکان هەموویان خویندەوارن، بە ژن و پیاو و پیر و گەنجەوە، شێخ سه‌عیدی نه‌وه‌ی شێخ ئه‌حمه‌د له‌ ساڵی ٢٠١٢ هه‌ستاوه‌ به‌ درووستكردنی کتێبخانەیەک لە گوندەکە بەناوی کتێبخانەی شێخ ئه‌حمه‌دی شاكه‌لی، بە ئاماجی ڕۆشنبیرکردنی خەڵکی سنوورەکە.

كتێبخانه‌ی گشتی شێخ ئه‌حمه‌دی شاكه‌لی، تاكه‌ كتێبخانه‌یه‌ له‌و گونده‌دا كرابێته‌وه‌ و شوێنی كتێبخانه‌كه‌ له‌سه‌ر شوێنەواری خه‌ڵوه‌تگه‌ی شێخ ئه‌حمه‌دی شاكه‌لی درووستكراوه‌، ئه‌و خه‌ڵوه‌تگه‌یه‌ له‌و ده‌مه‌دا جێگای ته‌سه‌وف و كۆڕوكۆبونه‌وه‌ و كاركردنی شێخ بووه. ‌      

لەو کتێبخانەیە زیاتر لە دوو  هەزار و ٣٠٠ سەرچاوەی جۆراوجۆری كوردیی هه‌یه‌، له‌بواره‌كانی، ئه‌ده‌ب، مێژوو، هونه‌ر، چیرۆک، ڕۆمان، فیكر، فه‌لسه‌فه‌، سیاسه‌ت، ژماره‌یه‌ك گۆڤاری كوردی ساڵی حه‌فتاكان به‌دواوه‌ له‌گه‌ڵ ڕۆژنامه‌كانی، ڕزگاری، هێڤی، هاوڵاتی ، كوردستانی نوێ، ئه‌لئیتحادی یه‌كێتی، بوونی هه‌یه‌ لەگەڵ ژمارەیەکی کەم کتێب بە زمانی عەرەبی، کە بەشێک لەو کتێبانە هی بناماڵەی شێخ سەعیدە و  بەشێکی دیکەی کتێبەکان دەزگاکانی حکومەت، خەڵک و ڕۆشنبیر پێشکەشی کتیبخانەکەیان کردووە.

ئه‌وانه‌ی سه‌ردانی ئه‌م كتێبخانه‌یه‌ ده‌كه‌ن بۆخواستنی كتێب یان خوێندنه‌وه‌، دانیشتوان و خوێندکارانی بنەڕەتیی و ئامادەیی گوندەکانی سه‌عداوه‌، كارێزه‌ی حه‌مه كه‌یفه‌، كه‌وا چه‌رموو، هه‌روه‌ها خوێندكارانی زانكۆی گه‌رمیان و سلێمانی و كفری وخانه‌قین و خوێندكارانی شاره‌دێیه‌كانی سه‌رقه‌ڵا و ڕزگاری-ن، له‌گه‌ڵ ئه‌وه‌شدا به‌شێك له‌مامۆستایانی زانكۆی گه‌رمیان وخوێنه‌ران ڕوو ده‌كه‌نه‌ كتێبخانه‌كه.‌

 ئه‌وه‌ی ئه‌م كتێبخانه‌یه‌ له‌ كتێبخانه‌كه‌ی تری گه‌رمیان جیاده‌كاته‌وه‌ ئه‌وه‌یه‌، ژماره‌یه‌ك سه‌رچاوه‌یی مێژووی و ئه‌ده‌بی له‌م كتێبخانه‌یه‌دا بوونی هه‌یه‌، له‌ شوێنه‌كانی تر به‌زه‌حمه‌ت ده‌ست ده‌كه‌وێت یان هه‌ر نیه‌، سه‌ردانیكردنی خوێنه‌ران بۆ كتێبخانه‌كه‌ جیاوازه‌، ڕۆژی وا هه‌یه‌ ١٠ بۆ ١٥ كه‌س سه‌ردانی كتێبخانه‌كه‌ ده‌كه‌ن، به‌تایبه‌ت ئه‌وكاتانه‌ی خوێندكاران سه‌رقاڵی ڕاپۆرتی ده‌رچوونیانن له‌زانكۆ و پەیمانگاکان، جاری واش هه‌یه‌ به‌ دوو  ڕۆژ شه‌ش كه‌س سه‌ردانی ده‌كات.

ئه‌م كتێبخانه‌یه‌، له‌ کاتی کردنه‌وه‌یه‌وه‌ تاوه‌کو ساڵی ٢٠١٦ شێخ سه‌عید خۆی سه‌رپه‌رشتیی کردووه‌، به‌ڵام یاسای کتێبخانه‌ی تایبه‌تی سنوری هه‌یه‌ ده‌بێت دوای ماوه‌یه‌ک له‌ کردنه‌وه‌ی هه‌ر کتێبخانه‌یه‌ک بدرێته‌ حکومه‌ت، بۆیه‌ ماوه‌ی دوو ساڵه‌ له‌لایه‌ن شێخ سه‌عید كتێبخانه‌كه‌ پێشكه‌ش به ‌به‌ڕێوه‌به‌رایه‌تی گشتیی كتێبخانه‌كانی گه‌رمیان كراوه‌‌ و له‌لایه‌ن ئه‌وانه‌وه‌ فه‌رمانبه‌رێكی بۆ دابین كراوه، فه‌رمانبه‌ره‌كه‌ ڕۆژانه‌ له‌ دوو كاتی جیاوازدا ده‌وامی ئاسایی خۆی ده‌كات وپێشوازیی له‌ خوێنه‌ران ده‌كات.

هۆشیار محه‌مه‌د، فه‌رمانبه‌ری كتێبخانه‌كه‌، به‌ڕۆژنیوزی وت: شێخ سه‌عید شاكه‌لی دروستكه‌ری ئه‌م كتێبخانه‌یه‌، له‌به‌ر ئه‌وه‌ی خۆی نووسه‌ر بووه‌ و له‌ بنه‌ماڵه‌كه‌یشیدا نووسه‌ر و شاعیر هه‌بووه‌، به‌گرنگی زانیوه‌ له‌م گونده‌ كتێبخانه‌یه‌ك بكاته‌وه‌، بۆ ئه‌وه‌ی ببێته‌ سه‌رچاوه‌یه‌كی باشتر بۆ خوێندكاران به‌ پله‌ی یه‌ك و دانیشتوانی ئه‌م گوندانه.‌

هۆشیار محه‌مه‌د، وتیشی: ئه‌گه‌ر بمانه‌وێت ژێر خانی ئابووریی به‌هێز بكه‌ین، ده‌بێت بایه‌خ به‌ گونده‌كان بده‌ین، به‌تایبه‌ت پێویسته‌ گونده‌كان له‌ڕووی ڕۆشنبیرییه‌وه‌ فه‌رامۆش نه‌كرێت، چونكه‌ ڕۆشنبیریی به‌ردی بناغه‌ی دروستبوونی كۆمه‌ڵگایه‌كی مۆدێرنه‌، له‌ئێستاشدا شوێنی كتێبخانه‌كه‌مان بچووكه‌ و له‌گه‌ڵ كۆمپانیای گازپرۆم له‌ هه‌وڵداین كتێبخانه‌كه‌ گه‌وره‌ بكه‌ین‌ و هه‌موو دره‌خسته‌ و دیزانه‌كه‌ی ته‌واو بووه.

ش.ف