گەرمیان، حەسرەتی بڕیارو تابلۆ ونبووەکان لەپیشانگایەکی شێوەکاریدا خرایەڕوو

بە ناونیشانی ''لەحەسرەتی بڕیارو تابلۆ ونبووەکان'' لە شارۆچکەی کەلار، پێشانگایەکی شێوەکاریی بۆ ژمارەیەک لە هونەرمەندانی سنوری گەرمیان، کرایەوە و پێشانگاکەکە تایبەت بوو بە بڕیاری شەهید ئاسۆ.


ئەمڕۆ لە هۆڵی شێوەکاری بەڕێوەبەرایەتی گشتی ڕۆشنبیری و هونەری گەرمیان، لە شارۆچکەی کەلاری ناوەندی ئیدارەی گەرمیان، لەژێر ناونیشانی ''لەحەسرەتی بڕیارو تابلۆ ونبووەکان'' بە ئامادەبوونی خانەوادەی بڕیاری شەهید ئاسۆ و هونەرمەندانی گەرمیان، بەڕێوەبەرایەتی گشتی ڕۆشنبیری و هونەری گەرمیان پێشانگایەکی شێوەکارییان بۆ شێوەکارانی گەرمیان کردەوە.

لە پێشانگاکەدا ٤۰ شێوەکاری سنوری ئیدارەی گەرمیان بە چل تابلۆی ڕەنگاوڕەنگ بەشداریان کرد، کە چەند تابلۆیەکی شەهید بڕیاریان بە شێوازی هونەری نەخشاندبوو تێکەڵ بە تابلۆی سروشت و گشتی.

لە کۆتایی پێشانگاکەشدا خانەوادەی بڕیاری شەهید ئاسۆ و هونەرمەندانی شێوەکاری بەشداربووی پێشانگاکە، خەڵاتی ڕێزلێنانانیان پێدرا.

بڕیاری شەهید ئاسۆی مام جەلال مەسۆیی، دوای شەهید بوونی باوكی لە ٣١ی تەموزی ئەمساڵ و لە هێرشێکی چەتەکانی داعش-دا، لە حەسرەتی باوکی تووشی جەڵتەی مێشک بوو، سەرئەنجام ڕۆژی ٢٥ی ئابی ئەمساڵ بڕیاری تەمەن چوار ساڵان لە نەخۆشخانەی شار لە شاری سلێمانی گیانی لەدەستدا.

ک.س