یەكەمین كەرنەڤاڵی ئاشتی لە هەڵەبجە بەڕێوەچوو

بۆ یەكەمجار و بەئامادەبوونی ژمارەیكی بەرچاو لە چین و توێژە جیاوازەكانی شاری هەڵەبجە، یەکەمین کەرنەڤاڵی ئاشتی جیهانی لە شارەکە بەڕێوەچوو، تیایدا چەندین چالاکیی هونەریی جۆراوجۆر پێشکەشکران.


ئێوارەی ئەمڕۆ لە هۆڵی بۆنەكانی شاری هەڵەبجە، ڕێکخراوی ڕۆژهەڵاتی ناوەڕاست بۆ ئاشتی هەمیشەیی، یەکەمین كەرنەڤاڵی ئاشتی لە شاری هەڵەبجە ڕێکخست.

لە سەرەتای كەرنەڤاڵەكەدا پێشانگایەكی تایبەت بە كاری دەستیی ژنانی هەڵەبجە كرایەوە، كە تیایدا سەرجەم ئەو كاڵا و كەرەستانە نمایشكرابوون كە ژنان بە دەستڕەنگینی خۆیان دروستییانكردبوون.

دواتر لە چەند قاپێكدا چەند جۆرە ڕەنگێکی جیاواز ئامادەكرابوون، ئامادەبووان بە دەستخستنە ناو ڕەنگەكانەوە پەیامی ئاشتییان دووپاتدەكردەوە، هەروەها وەك هێمایەك بۆ ئاشتی لە جێگایەكی تایبەتدا بەشێكی زۆری تابلۆ و ڕەمەزی ئاینە جیاوازەكان خرابوونەڕوو.

هەر لەو كەرنەڤاڵەدا پێشانگایەكی فۆتۆگرافی كرایەوە، كە تیایدا زیاد لە ٥٠ وێنەی فۆتۆگرافی ژمارەیەك وێنەگرانی شاری هەڵەبجە نمایشكرابوون، كە وێنەكان گوزارشت بوون لە ژینگە و سروشتی هەڵەبجە و دەوروبەری، هاوكات لە جێگایەكی تایبەتیشدا وێنەی سەرجەم ئەو سەركردە و كەسایەتییانەی جیهان نمایشكرابوون، كە بوونەتە خاوەنی خەڵاتی نۆبڵی ئاشتی.

لە بەشێكی تری كەرنەڤاڵەكەدا بە بەشاداری گروپی منداڵانی پەپولەی هەڵەبجە، چەند نمایشێكی گۆرانی و هەڵپەڕكێ ئەنجامدران و دواتر بە بەشداری گروپی هەڵەپەڕكێی كوردستان، چەند جۆرە هەڵپەڕكێیەکی كوردی پێشکەشکران.

بەشی كۆتایی كەرنەڤاڵەكە تەرخانكرابوو بە سازكردنی چەند دیبەیت و گفتوگۆیەك لە بارەی گرنگی ئاشتی و پێكەوەژیانی ئاین و نەتەوە و حزب و لایەنە سیاسییە جیاوازەكان لە هەرێمی كوردستان.

 

ب.ل