ئەندامێکى پەرلەمانى هەرێمى کوردستان ڕایگەیاند، نزیکەى ٣٣٠ هەزار کەس لە هەرێمی کوردستان لەژێر هێڵى هەژارییەوەن، کە ئەو کەسانە ناتوانن پێداویستییە سەرەکییەکانی ژیانیان وەک خواردن، پۆشاک، شوێنى مانەوە، خزمەتگوزارى تەندروستی و پەروەردە بۆخۆىان و منداڵەکانى دابین بکەن و حکومەتیش هیچ هاوکارییەکیان ناکات.
عومەر گوڵپى، ئەندامى فراکسیۆنى کۆمەڵى دادگەریی لە پەرلەمانى هەرێمى کوردستان لە نووسینێکدا لە فەیسبووکى خۆى ڕایگەیاندووە: بەپێی کۆتا ئامارى فەرمی، لە هەرێمی کوردستان ڕێژەی هەژاریی نزیکەی ٥.٥٪ـە، بەپێی ژمارەی دانیشتووان کە شەش ملیۆن کەسە، ئەو ڕێژەیە دەکاتە نزیکەی ٣٣٠ هەزار کەس، کە لەخوار هێڵی هەژارییەوەن.
عومەر گوڵپى باسی لەوەشکردووە، کە ئەو کەسانەى لەژێر هێڵى هەژارییەوەن ناتوانن پێداویستییە سەرەکییەکانی ژیانیان وەک خواردن، پۆشاک، شوێنى مانەوە، خزمەتگوزارى تەندروستی، پەروەردە و ژیانێکى شاسیتە بۆ خۆیان و منداڵەکانیان دابین بکەن.
ئەو پەرلەمانتارە دەشڵێت: لە هەرێمی کوردستان نزیکەی ١٠٠ خێزان کە هیچ سەرچاوەیەکی داهاتیان نەبووە، لە چوارچێوەی پڕۆژەی (چاودێری خێزان) لە وەزارەتى کاروکاروبارى کۆمەڵایەتى مانگانە بڕی ١٥٠ هەزار دیناریان وەردەگرت، بەڵام بەبیانووى چاکسازیی لە ناوەکان لە مانگی ١٢ی ساڵی ٢٠١٥و بە بڕیاری حکومەت مووچەی ئەو کەسانە ڕاگیرا، کە سەرجەم پارەی تەرخانکراو بۆیان بریتیبوو لەبڕی ١٤ ملیارى دیناری مانگانە.
عومەر گوڵپى دەڵێت، بۆ کۆتایهێنان بەو دۆخە و بە یاساییکردنی پشتیوانی دارایی بۆ هاوڵاتیانی هەژار، پێشنیازەیاسای (هاریکاری دارایی هەژاران لە هەرێمى کوردستان – عێراق)یان پێشکەشکردووە و ئێستا پێشنیازەیاساکە چاوەڕوانی بۆچوونی حکومەتە، بەڵام بەهۆی باشبوونی دۆخی داراییەوە، پێویستە حکومەت هیچ پاساوێک نەکەنە هۆی دەرنەچوونی یاساکە.
ئ.م
