ئەو بڕە هاوكارییەی وەزارەتی كاروباری كۆمەڵایەتی حکومەتی هەرێم بۆ پارێزگای هەڵەبجە تەرخانی کردبوو، جیاوازیی تێکەوت و بە یەکسانی دابەش نەکرا، بەڕێوەبەری چاودێریی و گەشەپێدانی كۆمەڵایەتی هەڵەبجەش نایشارێتەوە کە زۆربەی ئەوانەی لەو بڕە هاوکارییە سوودمەندبوون، بارودۆخی داراییان باشە و پێویستیان بەو هاوکارییە نەبووە.
كاتێك چووینە بەردەم بانكی هەڵەبجە، قەرەباڵغییەکی زۆر هەبوو کە بە ئاستەم بۆشایی لەنێوان دوو کەسدا هەبوو، هەزاران ناو بە دیواری بانکەکەوە هەڵواسرابوون، ژنان و پیاوان بەوردی هەركەسە و بۆ ناوی خۆی دەگەڕا و لە خەمی وەرگرتنی ١٠٠ هەزار دینارەکەی حكومەت بوون، هەموویان نیگەرانی بە ڕوخسارییانەوە دیاربوو، خراپی دۆخی ژیان و گوزەرانیان ڕەنگیدابویەوە لە چاویاندا.
مانگی تەموزی ئەمساڵ وەزارەتی كاروباری كۆمەڵایەتی حکومەتی هەرێم لە ڕێگەی فۆڕمێكەوە لە تەواوی شارەكاندا ناوی خێزانە كەمدەرامەتەكانی تۆماركرد بۆ وەرگرتنی بڕێک هاوكاریی، لەو چوارچێوەیەشدا ژمارەیەك هاوڵاتی سنوورەکە سودمەندبوون لە وەرگرتنی بڕی ٥٠ كیلۆ برنج و ١٠ دەبە زەیت و بڕی ١٠٠ هەزار دینار.
لە سنووری پارێزگای هەڵەبجە نزیكەی ١٠ هەزار خێزان فۆڕمی هاوكارییان پڕكردەوە لەو ژمارەیەش پێنج هەزار و ٥٠٠ كەس سودمەندبوون لە وەرگرتنی بڕی ١٠٠ هەزار دینار، بەڵام بەشێکی زۆر لە هاوڵاتیانیش نیگەرانن لەوەی هاوکارییەکەیان پێ نەگەیشتووەو لەبری ئەوان کەسانێک سودیان لێ وەرگرتووە کە دۆخی داراییان باش بووە.
حەمەئەمین عەبدولكەریم، پاش ئەوەی ناوەكەی نەگەڕابوویەوە بە نیگەرانییەوە قسەی بۆ ڕۆژنیوز کردو وتی، بەشێكی زۆری ئەوانەی ناویان هاتۆوەتەوە، مووچەخۆر و کەسانی دەوڵەمەندن.
خالید مەحمود هاوڵاتیەكی دیكە بوو کە بەهەمانشێوە ناوی بۆ وەرگرتنی هاوکارییەکە تۆمار کردبوو، بەڵام ئەویش ناوی نەگەڕاوەتەوە و باسی لەوە دەکرد، ئەوانەی ناویان هەڵواسراوە، زۆربەیان مووچەیان هەیە و کێشەی داراییان نییە بە بەراورد بە خەڵکانی کەمدەرامەتی ناوچەکە، دووپاتیشیدەکاتەوە کە “واسیتە” و خزم خزمێنە ڕۆڵی هەبووە لە هەڵبژاردنی ناوەکان بۆ وەرگرتنی ئەو هاوکارییە.
سالار فەتاح، بەڕێوەبەری چاودێری و گەشەپێدانی كۆمەڵایەتی هەڵەبجە بە ڕۆژنیوزی ڕاگەیاند، ئەو هاوكارییەی ئێستا دابەش دەكرێت، سەرتاسەرییەو بەپێی ڕێژەی دانیشتوان لە تەواوی پارێزگاكانی هەرێم دابەشكراوە، پارەكەش بۆ ئەو كەسانەیە کە داهاتی مانگانەیان ناگاتە ٣٠٠ هەزار دینار.
جەختیشیکردەوە، بەشێك لەو كەسانەی ناویان گەڕاوەتەوە، بارودۆخی داراییان باشەو ئەوان بە پشت بەستن بە وەرگرتنی زانیارییەکان ناوی ئەو کەسانەیان تۆمارکردووە.
بەهۆی قەیرانی دراییەوە ئاستی هەژاری لە هەرێمی کوردستان بە ڕێژەیەکی بەرچاو زیادیکردووە و ڕێژەی بێکاریش بۆ نزیکەی ٢٠٪ بەرزبووەتەوە.
ی. ک
