بەسکی برسیی و بێ جلوبەرگ و سوتەمەنیی چۆن گەرم ببنەوە؟

وەرزی سەرما و باران دەستیپێكردووە و ئاواره‌كانی كا‌مپی تازه‌دێ-ش نە خۆراکی پێویستییان هەیە، نە جلوبەرگی زستانە و سوتەمەنیی، منداڵەکانیشیان پێڵاویان نییە و بەپێی خاوس دەگەڕێن.


كا‌مپی ئاواره‌كانی تازه‌دێ، كە ده‌كه‌وێته‌ باكوری شارۆچكەی كه‌لار-ی ناوەندی ئیدارەی گەرمیان، ٣٤٠ خێزانی ئاواره‌ی تێدا نیشته‌جێیه‌، ئاوارەكان سەر بە پارێزگاكانی به‌غدا، موسڵ، دیاله‌، سه‌لاحه‌دین و بابل-ن، لە هەرسێ نەتەوەی كورد، عەرەب و توركمانی تێدایە، ئەو ئاوارەنە له‌باره‌ی دۆخ و گوزەران و پێداویستییەكانیانەوە بۆ ڕۆژنیوز دوان.

گرنگترین و سەرەكییترین داواكارییەكانی ئاوارەكانی كا‌مپی تازەدێ‌ بریتین لە‌، خواردن، ‌دابینكردنی سوته‌مه‌نی و ئامێری گه‌رمكه‌ره‌وه،‌ فه‌رش و ڕاخەر و داوا له‌ ڕێكخراوه‌ مرۆییه‌كان ده‌كه‌ن ئەو پێداویستییانەیان بۆ دابینبكه‌ن. 

ئاوارەکان، پۆشاکی زستانە و پێڵاوی گونجاویشیان نییە، بەجۆرێک منداڵەکانیان یان نەعلیان لەپێدایە، یانیش هەر پێیان خاوسە و هیچ پێڵاوییەکیان نییە تا لەپێی کەن.

کێشەیەکی دیکەی ئاوارەکان کۆنبوونی کەرەڤانەکانیانە، کە وەک خۆیان باسی دەکەن سەربانی کەرەڤانەکایان کۆن بووە و لەکاتی باراندا دڵۆپە دەکات و ئەو کەلوپەلە کەمەشی هەیانە تەڕ دەبێت.

له‌ كا‌مپه‌كه‌دا، خوێندنگا، نه‌خۆشخانه‌، مزگه‌وت، باخچه‌ی ساوایان و یاریگای منداڵان‌ هه‌ن‌، بەڵام دانیشتوانی كا‌مپه‌كه‌ نیگه‌رانن له‌وه‌ی هه‌فته‌ی یەك جار پزیشك لە نه‌خۆشخانه‌كه‌یان داده‌نیشێت، ئه‌مه‌ش كێشه‌ی بۆ دروستكردون و بۆ چاره‌سه‌ری نه‌خۆشیه‌كانیان ده‌بێت بڕۆنه‌ ده‌ره‌وه‌ی كا‌مپه‌كە.

ته‌ها یاسین، ئاوارەیەكی عه‌ره‌بی كامپی تازەدێ-یە، دانیشتووی شاری بابل-ه‌، وتی:"نه‌وت و غاز و زۆپا و فه‌رشمان نییه تا له‌وه‌رزی زستان و سەرمادا به‌كاریان بهێنین، بۆیە خۆمان ده‌چین له‌ چه‌می سیروان له‌ نزیك كا‌مپه‌كه‌ دارده‌هێنین و به‌كاریدەهێنین بۆ خۆگه‌رمكردنه‌وه و ‌چێشتلێنان."

فازل نه‌جیب، یەكێكە لە ئاوارە كوردەكانی خورماتوو و لەكامپی تازەدێ نیشتەجێیە، وتی:"ژیان و گوزه‌ران له ‌كامپی تازەدێ خراپه‌، ئیشوكار نیه‌ و ناتوانین بچینە دەرەوەی كەمپەكە كار بكەین، پێداویستیمان له‌لایه‌ن ڕێكخراوه‌كانه‌وه‌ بۆ نایه‌ت، كێشه‌ی خواردنمان هه‌یه‌، پێشووتر خۆراكمان به‌سه‌ردا دابه‌شده‌كرا، دوای ماوه‌یه‌ك كرا به ‌پاره‌، بەڵام دوو مانگه تەنها‌ یه‌كجار پاره‌مان پێدراوه‌، بۆیە به‌ڕاستی ژیانمان زۆر ناخوشه‌".

ڕۆژنیوز سه‌ردانی به‌ڕێوه‌به‌ری كا‌مپی ئاواره‌كانی تازه‌دێی كرد، بۆ ئه‌وه‌ی له‌سه‌ر كێشه‌ و گرفته‌كانی نێو كه‌مپه‌كه‌ گفتوگۆی له‌گه‌ڵ بكات، به‌ڵام ئامادە نەبوون لێدوان بدەن.

 

ش.ف