تەقینەوەکان کەرکوکییەکانیان لەم جەژنەدا نیگەران کردووە

کەرکوکیان بەهۆی تەقینەوەکانی ڕاژانی ڕابردووەوە، لەم جەژنەدا نیگەرانن لە دۆخی شارەکەیان، داوا لە هەموو پێکهاتەکان دەکەن کە هەوڵی پاراستنی ئاشتەوایی بدەن، دەشڵێن، لایەنەکان یەکدەنگ بن دۆخی کەرکوکیش باش دەبێت.


لە شاری كەركوك چەند ڕۆژێك پێش  جەژنی ڕەمەزان، شەش تەقینەوەی یەك لە دوای ڕوویدا، ئەمەش وایكرد بەڕێوەچوونی جەژان لە كەركوك بە ترس و دڵەڕاوكێیەوە بەڕێ بكرێت، هەروەها قوربانییەکان تەواویی پێکهاتەکانی کەرکوکیان نیگەران کردووە.

عەلی عەبدولڕەحمان گەنجێكی شاری كەركوكە، بەتەواویی نیگەران بوو لەوەی، کە لە کۆتاییەکانی ڕۆژانی ڕەمەزاندا هێرشی تیرۆرستی کرایە سەر کەرکوک و چەنیدن قوربانی لێکەوتەوە.

عەلی دەڵێت: من نیەگەرانم لەم دۆخە، نیگەرانم لەو نائارامیەی كە لە شارەكەم هەیە، لەو دڵەڕاوكێیەی لای تاكی كورد و سەرجەم نەتەوەكانیتر هەیە، وە داوكارم هێزە ئەمنییەكان ڕۆڵێكی باش بگێڕن بۆ سەقامگیری و ئارامی ئەم شارە.

ڕێبین سەبور، هاوڵاتیەكی دیکەیە و دەڵێت، دیارە جەژن بە ئاشتی و پێكەوەژیان تەبایی ناسراوە، شاری كەركوكیش بە شاری برایەتی و ئاشتی ناسراوە، "هەمیشە نەتەوەكان لەم شارە بە خۆشی جەژنیان كردووە، بەڵام بەداخەوە دەبینین هەموو ساڵێك كەركوكییەكان مەرگ دەبێتە دیاری جەژنیان، بەداخەوە بینمان بۆ ئەم جەژنە چەندین كەسمان لەدەسدا تا ئەوەی بگەین بەم جەژنە، ئێمە داوا دەكەین كە چیتر هاوڵاتیان ئەم شارە قوربانی نەدەن و نەتەوەكانی نەچەوسێنرێتەوە بۆ ئەوەی كە سەرجەم نەتەوەكانی كەركوك بە ئاشتی و بەخۆشی پێكەوە بژین".

ئەو گەنجەی كەركوك وتیشی:"جەژنی كەركوك لە جەژنی شارەكانیتر ناچێت، چوونكە شارە فرە كلتور و فرە نەتەوەیە، هەمووان پێكەوە بە ئاشتی جەژن پێكەوە بەڕێدەكەین، بەڵام بەداخەوە تاریك پەرستان چاویان بەم ئاشتییە هەڵنایەت".

هەروەها سەرمەد سەمەد، لە ڕێگای ڕۆژنیوزەوە داوا دەكات "داوا لەسەرجەم نەتەوەكانی شارەكە دەكەم، كە یەكبگرن بۆ تێپەڕاندنی ئەم قۆناغە، ئەمە پەیامی جەژنی منە بۆ كەركوكییەكان، دەبێت هەمووان هەوڵبدەین كە برایەتی لەم شارە نەشێوێنرێت شەڕ ڕوونەدات، بە تایبەت ئەگەری شەڕی كورد و عەرەب و كورد و توركمان، تەقینەوەكانی ئەم شارەش ئەوەیە كە ناهلێن بۆ چەند ڕۆژێك لەم شارە بحسێنەوە ناهڵێن پشویەك بدەین".

سەرمەد داوی ڕێککەوتنی لایەنەکان دەکات و دەڵێت: دۆخی سیاسی چەقبەستووی كەركوك هۆكارە بۆ خراپبوونی دۆخی ئەمنی، ئەگەر دۆخی ئەمنی سیاسی شارەكە ئارام بێت ئەوا دۆخی ئەمنیش ئارام و ئاسایی دەبێت، بۆیە گرنگە لایەنەكان هەوڵی ڕێكەوتن بدەن".

س.ح