دژی گەڕانەوەی مەحما خەلیل سبەینێ لە سنونێ خۆپیشاندانە

سبەینێ لەدژی گەڕاندنەوەی مەحما خەلیل وەكو قائیمقامی شەنگال، لە كۆمەڵگای سنونێ خۆپیشاندان بەڕێوەدەچێت.


ناڕەزایەتییەكان بەردەوامن لە دژی هەوڵەكانی پارتی دیموكراتی كوردستان - عێراق بۆ گەڕاندنەوەی مەحما خەلیل بۆ شەنگال و دووبارە دەستبەكاربوونەوەی وەكو قائیمقامی شارۆچكەكە،  لەو چوارچێوەیەشدا بڕیارە سبەینێ لە كۆمەڵگای سنونێ پێكهاتە جیاوازەكان خۆپیشاندان بكەن.

خۆپیشاندانەكەی سنونێ لەلایەن كۆمیتەی یەكێتیی شەنگال و ئەنجومەنی خۆبەڕێوەبەری دیموكراتیی شەنگال ڕیێكدەخرێت، کاتژمێر ٠٩:٠٠ی بەیانی لەبەردەم بەڕێوەبەرایەتیی كۆمەڵگای سنونێ خۆپیشاندانەكە دەستپێدەكات و تەواوی پێكهاتە جیاوازەكانی شەنگال بەشداریدەكەن.

پارتی دیموکراتی کوردستان- عێراق، دەیەوێت مەحما خەلیل قائیمقامی پێشووی شەنگال و ئەندامانی پێشووی ئەنجومەنی بەڕێوەبردنی شارۆچكەكە بگەڕێنێتەوە بۆ شەنگال و دووبارە دەستبەكاربنەوە، بەڵام پێكهاتەكانی شەنگال دژی ئەو هەنگاوەن و دەڵێن، ناكرێت خەڵكانێك لەماوەی چوار ساڵی ڕابردوودا دووجار شەنگالییەكانیان بەتەنها بەجێهێشتووە، دووبارە بەرپرسیارێتی لە شەنگال وەربگرنەوە، داواشدەكەن شەنگالییەكان خۆیان خەڵكانێك هەڵبژێرن بۆ بەڕێوەبردنی شارۆچكەكە.

 

ش.ف