دیواری میهرەبانی بووەتە هیوایەك بۆ بە هاناوەچوونی ئاوارە و هەژاران

دیواری میهرەبانی لە شارۆچكەی ڕەواندوز، كە لەلایەن چالاكوان و خەڵكی ڕەواندوز بۆ كۆمەككردن و كۆكردنەوەی هاوكاری و پێداویستی تایبەت بە كەسانی كەمدەرامەت و ئاوارەكانی دەڤەرەكە لە سەنتەری شار دروستكراوە، بووەتە هیوایەك بۆ بە هاناوەچوونی ئاوارە و هەژاران.


لە ناو سەنتەری شارۆچكەی ڕەواندوزی سەر بە پارێزگای هەولێر، دیوارێک کە ناونراوە دیواری میهرەبانی وەک پرۆژەیەکی خێرخوازیی ماوەی ساڵێكە بەدروشمی "ئەوەی لێت زیادە بیبەخشە و ئەوەی دەتەوێت هەڵیگرە" دروستكراوە، دیوارەكە بەردەوام كراوەیە بۆ ئەوەی هاوڵاتیان هاوكاریەکانیانی لێ دابنێن و بە پێچەوانەشەوە ئەوەی پێویستیانە لێی هەڵبگرن.

تائێستا هەر لە ڕێگەی ئەو دیوارەوە چەندجارێك هاوكاری و پێداویستی بۆ كوردانی ئێزدی و ڕۆژهەڵات و ڕۆژئاوای كوردستان کۆکراوەتەوە.

مەهدی ڕەواندوزی، چالاكوان كە لە ئێستادا لەگەڵ هاورێكەی مەولان، سەرپەرشتی دیواری میهرەبانی دەكەن بۆ ڕۆژنیوز لە بارەی پڕۆژەکەوە دواو وتی "دیواری میهرەبانی پرۆژەیەكی خێرخوازییە لەپێناو هاندانی گیانی هاوكاری هاوشارییان و ئاگاداربوون و خاوەنداریەتیكردن لە یەكتری، دروشمی دیوارەكە "ئەوەی لێت زیادە بیەخشە و ئەوەی دەتەوێت هەڵیبگرە" لە ئێستادا زیاتر كار لەسەر جلوبەرگ، پێلاو و پێداویستیەكانی خەوتن  دەكەین و لە  ئایندەش تەواوی پێداویستیەكانی ماڵ دەگرێتەوە، دیواری میهرەبانی لە خەڵكەوە بۆ خەڵكە واتا هاوشارییان جلوبەرگ و پێداویستی لەبەركردنی زیادی خۆیان دەبەخشن بە دیوارەكە و ئەو هاوشاریەش کە پێویستی پێی بێت دەیبات و بەكاری دەهێنێتەوە".

مەهدی وتیشی: "ماوەیەك لەمەوبەر پڕۆژەكە سستی تێكەوت، بەڵام یەكێك لە خێرخوازان ئامادەیی خۆینیشاندا بەدروستكردنی كەپرێك و گواستنەوەی دیوارەكە بۆ شوێنێكی شیاوتر، ئێستا دیواری میهرەبانی لە ڕەواندوز لە شێوەی كابینەیەكی بچوكە، بەڵام گەورەترین خزمەت بە هاوشاریان و خەڵكی دەرەوەی شار دەكات و چەندین جار لە دیوارەكەوە كۆمەك گەیندراوەتەوە میوانانی كوردانی ئیزدی و ڕۆژئاوا و ڕۆژهەڵات و پێش چەند ڕۆژێك هاوكاری گەیەندرایە میوانانی كۆبانێ لە شاری سۆران".

ئەو چالاكوانە ئاماژەی بەوەشدا "ئەم هاوكاریە لە سایەی خەڵكی خێرخواز و مرۆڤ دۆستی ڕەواندوز كە زۆر دڵسۆزانە خاوەنداریەتی لە دیوارەكە دەكەن و ناهێڵن بۆ خولەكێك دیوارەكە بەبێ جلوبەرگ بێت و هاوكاری شارەوانی و ئیدارەی ڕەواندوزیش گڕوتینی زیاتری بە پڕۆژەكەداوە".

كامەران مەلا مستەفا، یەكێك لەو هاووڵاتیانەیە كە ڕۆژانە ئەركی جیاكردنەوەی ئەو پێداویستی و هاوكاریانە ئەنجام دەدات كە لەلایەن خەڵكەوە لە دیوارەكە دادەنرێت بۆ كەسانی كەمدەرامەت و بە تایبەت ئاوارەكان. وتی: "ئەو شوێنە توانیویەتی تاڕادەیەكی باش جلوبەرگ و پێداویستی ماڵ بۆ كەسانی كەمدەرامەت دابین بكات كە توانای كڕینی جلوبەرگیان نیە بۆ خێزانەكەیان وە بەتایبەتی بۆ ئاوارەكان ئەو جلوبەرگانەی ئێستاش لەلایەن خەڵك لە شوێنەكە دانراون زیاتر جلی زستانەن".

هەروەها ڕزگار ئەحمەد یەكێك لە دانیشتوانی ڕەواندوز، لەسەر گرنگی دیواری میهرەبانی بۆ ڕۆژنیوز، وتی "ئەو بیرۆكەیە كارێكی زۆر باشە و لە جێگای خۆیەتی، چونكە بەبێ ئەوەی داوا لەكەس بكرێت خەڵك خۆی دێت پێداویستی دادەنێت و ئەوانەش كە پێویستیان بە جلوبەرگ هەیە خۆیان دێن و دەیبەن".

 ئەو هاووڵاتیە بوونی شوێنێكی وەك  دیواری میهرەبانی لە هەموو شارێك بە پێویست دەزانێت و پێیوایە دەكرێت دیواری میهرەبانی لە ڕەواندوز فراوانتریش بكرێت و كەسانی سەرمایەدار هاوكاری و پێداویستیەكانیان لەم شوێنە دابنێن بۆ بەهاناوەچوونی لێقەوماوان و هەژاران".

ک.س