دەستەی مافی مرۆڤ: ئەو بنەماڵانەی بەچەک شەڕ دەکەن ئەندامی دەزگا ئەمنییەكانن

وتەبێژی دەستەی سەربەخۆی مافەكانی مرۆڤ لە هەرێم، ڕایدەگەیەنێت، هێشتا چەك لەدەست گروپ و بنەماڵە و عەشیرەتەكاندا ماوە و ئەو بنەماڵە و عەشیرەتانەش کە بەشەڕدێن كەسانی ئاسایی نین، بەڵكو ئەندامی دەزگا ئەمنیەكانن، چالاكوانێكی مەدەنیش دەڵێت: دەبێ حكومەت مۆڵەتی پێدانی چەك زۆر توند بكات.


بەپێی‌ ئامارێك كە لە هێزەئەمنییەكان دەست ڕۆژنیوز، كەوتووە بە تەنها لە هەفتەی ڕابردوو لە سنوری پارێزگای هەولێر و دهۆك بەهۆی چەكەوە دوو كەس كوژراون پێنج كەسی تریش بیندرابوون، ئەمەش نیگەرانی زۆری شەقام و بەرپرسانی مافی مرۆڤی بەدوای خۆیداهێناوە.

ڕۆژی ٢٠ی کانوونی دووەمی ٢٠١٩ دەستەی سەربەخۆی مافی مرۆڤی هەرێمی کوردستان بە ئامانجی كه‌مكردنه‌وه‌ی دیارده‌ی چه‌كداری و بە بەشداریی ڕاگەیاندنەکان، مامۆستایانی ئاینیی، ڕۆشنبیران و ڕیکخراوەکانی کۆمەڵگای مەدەنیی، هەڵمەتێکی ١٥ ڕۆژیی ڕاگەیاند.

لە بارەی دیاردەی چەکداری و ئەنجامی هەڵمەتەکەیان، محەمەد گۆمەشینی، وتەبێژی دەستەی سەربەخۆی مافی مرۆڤی هەرێمی كوردستان، وتی: هەڵمەتەكەمان سەركەتوو بوو، دوای هەڵمەتەكەش بە نووسراوی فەرمی وەزارەتی ناوخۆمان ئاگاداركردەوە لەوەی كە چەك مەترسییە لە دەست هاوڵاتیان و دەبێ ئەوانیش چالاكیان هەبێ، دواتر دەستیان بە هەڵمەتێك كرد و زۆرترین چەكیان دەست بەسەرداگرت، هەروەها هەڵمەتەكە هەولێر، سلێمانی، دهۆك، هەڵەبجە، گەرمیان، سۆران و ڕاپەڕینشی گرتەوە، جگە لە چەكیش ژمارەیەك لە ئۆتۆمبیلی بێ مۆڵەت و بێ تابلۆش دەستیان بەسەردا گیرا".
وتیشی: "كێشەكە لەوەدایە ئەم هەڵمەتە كاتییە و ئەو هاوڵاتیانەی چەكیان هەیە سەرەتا دەیشارنەوە بەڵام دواتر چەكەكان دەردێننەوە و هێشتا چەك لەدەست هاوڵاتیان و عەشیرەتەكان هەیە".


محەمەد گۆمەشینی، ئاماژەی بەوەشكرد "بەدواداچوونەكانمان بەردەوامیان هەیە لەسەر ئەوەی كە هەركاتێك دوو بنەماڵە یان دوو گروپ و عەشیرەت بەشەڕدێن ئەندامانی شەڕكەر، كەسانی ئاسایی نین، بەڵكو ئەندامی دەزگا ئەمنیەكانن، پۆلیس، پێشمەرگە یان ئاسایشن، چونكە ئەوانە ئازادانە چەك بەكاردێنن".
ئەو بەرپرسەی دەستەی مافی مرۆڤ، ئاشكراشیدەكات، بۆ بەرگرتن لەو دیاردەیە دەستەی مافی مرۆڤ چەند خاڵێكی داوەتە وەزارەتی ناوخۆ تا كاری لەسەر بكات لەوانەش "هیچ ئەندامێكی هێزە ئەمنییەكان چەك نەباتە ماڵەوە، چونکە كە چەك لە شوێنی دەوام بوو ئەگەر شەڕ ڕوویدا لە نێوان خێزانەكان و لە كۆڵان چەك بەكارنایەت، كاتێك پۆلیس و ئاسایش دەچنە شوێنی شەڕەكان ترسی ڕووبەڕووبوونەوە هەیە، هەروەها مەفرزەی بەردەوام هەبێت لەناكاو دەربچێت ئەوکات ئەوانەی چەكیان هەیە ترسیان دەبێت، هەروەها دۆسییەكانی بەردەم دادگا پەلەیان تێدا بكرێت و تاوانباران بەسزا بگەیەنرێن، بۆیە ئێمە داوامان كردوە و ئێستاش هەڵمەت هەیە، بەڵام وەك پێویست نین و پچرپچڕن".


هەر لەسەر ئەو پرسە سەلام كەمال، توێژەر و چالاكوانی كۆمەڵگای مەدەنی، ڕایگەیاند: لەماوەی ڕابردوو بینیمان لەسەر ئاستی كوردستان و لە هەولێر چەند دیاردەیەكی كوشتن ڕوویدا ئێمە دەبێ لە تاكەوە دەست پێبكەین لە هۆشیاركردنەوەی لە بەرامبەر بەكارهێنانی چەك كە زۆر گرنگە لە ڕاگەیاندنەوە هۆشیار بكرێتەوە كە چەك سودو زیانی چییە.


وتیشی: دەبێت حكومەت مۆڵەتی پێدانی چەك زۆر توند بكات و هەروەها بەدواداچوون بۆ دیاردەكانی چەك بكات و بەرەنگاری حاڵەتەكان ببێتەوە و لە هۆكارەكانی كوشتن بكۆڵێتەوە، ئێمە كۆمەڵگەیەكین خەریكین بەرەو دنیای پێشكەوتن هەنگاو دەنێین و داوای دەوڵەتی خۆمان دەكەین، بەڵام لە لایەکی دیکەوە ساڵەكانی نەوەدی سەدەی رابردوو خەریکە زیندوو دەبێتەوە كە دەمانبینی چ دیاردەیەكی زەقی چەك هەڵگرتن هەبوو.

ک.س