سلێمانی، پلانی جەژن ڕاگەیەندرا

لە شاری سلێمانی پلانی جەژنی پیرۆزی قوربان ڕاگەیاندراو قائیمقامی شارەكەش دەڵێت: هەموو ڕێوشێنێكی پێویست گیراوەتەبەر بۆ ئەوەی هاوڵاتیان و گەشتیاران لە بارودۆخێكی ئارامدا پێشوازی لە رۆژانی جەژن بكەن، وە هیچ شەقامێکی شار داناخرێت لە جەژندا.


بە مەبەستی دانانی پلانی جەژنی قوربان و ئامادەكاری فەرمانگە پەیوەندیدارەكان لە رۆژانی پێش جەژن و رۆژانی جەژن، ئەمڕۆ ئاوات محەمەد قائیمقامی سلێمانی لەگەڵ لیژنەی ئەمنی سلێمانی و بەڕێوەبەری فەرمانگە پەیوەندیدارەكانی سلێمانی كۆبووەوە.

دوای کۆبوونەوەکە لە کۆنگرەیەکی ڕۆژنامەنووسیدا ئاوات محەمەد قائیمقامی سلێمانی رایگەیاند: بۆ ئەوەی هاوڵاتیان و گەشتیاران لە بارودۆخێكی ئارام و بێ گرفتدا پێشوازی لە جەژنی پیرۆزی قوربان بكەن هەموو ئامادەكارییەكی پێویست كراوە، لە ڕۆژانی پێش جەژن و ڕۆژانی جەژن هیچ شەقامێك بەڕووی هاتووچۆی شۆفێراندا داناخرێت، بەڵكو تیمەكانی هاتووچۆ هاوكار دەبن بۆ ڕێكخستنی شەقام و رێگەو بانەكان بۆ ئەوەی هاوڵاتیان بەبێ گرفت سەردانی هەر شوێنێك بكەن كە دەیانەوێت.

لە بارەی كارئاسانی بۆ ئەو گەشتیارانەی كە ڕوو لە پارێزگای سلێمانی دەكەن، ئاوات محەمەد وتی، لە بازگەكان و شوێنە گەشتیارییەكانی سلێمانی تیمەكان راسپێردراون هەموو كارئاسانی و هاوكارییەك پێشكەش بە گەشتیاران و ئەو میوانانە بكەن كە روودەكەنە سلێمانی.

وتیشی: سەرجەم تیمە خزمەتگوزارییەكان و هێزە ئەمنییەكان لە ڕۆژانی جەژندا لە سەنتەری شاری سلێمانی و هەموو شوێنە گشتیەكان لە ئەركدا دەبن بۆ پارێزگاری كردن لە هاوڵاتیان و ئەو گەشتیارانەی كە ڕوو لە پارێزگای سلێمانی دەكەن.

س.ح