لەمساڵدا زیاتر لە ٧٠٠ هەزار گەشتیار هاتوونەتە سۆران

هاتنی گەشتیار بۆ ناوچە گەشتیارییەکانی سنووری سۆران زیادی کردووە و لەمساڵدا زیاتر لە ٧٠٠ هەزار گەشتیار هاتوونەتە سنووری سۆران، ئەوەش بە وتەی بەڕێوبەری گەشتیاریی سۆران بە بەراورد بە ساڵی ڕابردوو ٢٥٪ زیادی کردووە.


لە دەڤەری سۆران و ناوچەی باڵەکایەتی، چەندین شوێنی گەشتیاریی هەیە، کە بوونەتە هۆی ڕاکێشانی سەرنجی گەشتیاران و ساڵانە سەدان گەشتیار لە وەرزە جیاوازەکاندا سەردانی ئەو ناوچەیە دەکەن.

بارزان محمد، بەڕێوەبەری گەشت و گوزاری سۆران بە ئاژانسی ڕۆژنیوزی وت: لەمساڵدا زیاتر لە 700 هەزار گەشتیار و سەردانیكەر ڕوویان لەناوچە گەشتیارییەكانی دەڤەری سۆران كردووە، پێشبینیش دەكەین ئەو ڕێژەیە بۆ یەك ملیۆن بەرزبێتەوە تاكو كۆتایی ساڵ، ئەوەش بە بەراورد بە ساڵی ڕابردوو ٢٥٪ زیادی کردووە.

بارزان محمد، یەکێک لە هۆکارەکانی زیادبوونی گەشتیار-ی بۆ بڕیارێکی حکومەتی هەرێم گەڕاندەوە کە لە 1/9/2019 دا دەرچووە لەبارەی وەرنەگرتنی پارە لەو گەشتیارانەی لە ناوڕاست و باشوری عێراقەوە دەهاتنە هەرێمی کوردستان، کە پێشتر لە بازگەی کەرکوک بڕی ١٠ هەزار دینار لە هەموو گەشتیارێک وەردەگیرا.

بەڕێوبەری گەشتوگوزاری سۆران دەشڵێت ئەو بڕیارە وادەكات داهاتی گەشتیاری لەهەرێمی كوردستان زیادبکات و ئابووری هەرێم ببوژێتەوە.

د.ع