لە خانەقین پۆلیسی كۆمەڵگایی دامەزرا

لە شارۆچكەی خانەقین دامەزراندنی كۆڕبەندی پۆلیسی كۆمەڵگایی ڕاگەیەندرا، بەرپرسێکی کۆڕبەندەکەش دەڵێت: دەیانەوێت ببنە پردێك لە نێوان كۆمەڵگا و پۆلیس، بۆ چارەسەركردنی كێشە کۆمەڵایەتییەکان.


ئەمڕۆ لە شارۆچكەی خانەقینی سەر بە پارێزگای دیالە، بە پاڵپشتی ڕێكخراوی كۆچی نێودەوڵەتی و وەزارەتی ناوخۆی عێراق، دامەزراندنی كۆڕبەندی پۆلیسی كۆمەڵگایی ڕاگەیەندرا کە ئەندامانی کۆڕبەندەکە پێکدێن لە چالاکوانانی مەدەنی.

سەروەر عەلی، جێگری بەرپرسی كۆڕبەندی پۆلیسی كۆمەڵگایی لە خانەقین بە ڕۆژنیوزی وت: ئامانج لە دامەزراندنی پۆلیسی كۆمەڵگایی ئەنجامدانی هۆشیارییە لە نێو كۆمەڵگادا لە بوارە جیاجیاكان و دروستكردنی پردێكە لە نێوان كۆمەڵگا و پۆلیس، بۆ چارەسەركردنی كێشەكان لە بوارە جیاجیاكان و ئەنجامدان و کردنەوەی خولی هۆشیاری بۆ توێژە جیاوازەکان.

وتیشی: ئێمە وەكو ژمارەیەك كەسی چالاكوانی بوارە جیاجیاكان لە خانەقین، بەشێوەی خۆبەخش كاردەكەین لەم كۆڕبەندە كە وەزارەتی ناوخۆی عێراق بە هاوكاری ڕێكخراوی كۆچی نێودەوڵەتی (iom) پاڵپشتی دەكەن.

 لای خۆیەوە عەمید لەمیعە محەمەد، ئەندامی كۆڕبەندی پۆلیسی كۆمەڵگایی وتی: ئەمجۆرە كۆبەندەی پۆلیسی كۆمەڵگایی لە سەرجەم ناوچەكانی عێراقی بوونی هەیە بۆ دروستكردنی پەیوەندی لە نێوان كۆمەڵگا و دەزگاكانی حكومی ئەم كۆڕبەندە ڕۆڵی ناوەندگێڕی و هۆشیاری دەبینێت.

وتیشی: پۆلیسی كۆمەڵگایی كار بۆ ئەوەدەكات كە كۆمەڵگا هۆشیار بكاتەوە لە دیاردە نامۆ و خراپەکان و هەوڵی چارەسەركردنی بدات لە ڕێگای دامودەزگا حكومییەكانەوە، ئاشکراشیکرد کە یەكەم هەنگاو و چالاكییان لە ناوەندەكانی خوێندن دەبێت و هەڵمەتی هۆشیاری لەسەر مەترسی بەكارهێنان و بازرگانی کردن بە ماددە بێهۆشكەرەوەكان و توندوتیژی سێكسی ئەنجام دەدەن.

ک.س