لە دایەنگەوە تا تەمەنی خانەنشینیی هاوکاریی دەبەخشنە ڕۆژئاوا

لە دایەنگەوە و تا تەمەنی خانەنشینیی، هاوڵاتیانی شاری هەولێر بەدەم کەمپەینی هاواری نیشتیمانەوە دەچن و هاوکاریی دەبەخشنە هاوڵاتیانی باکور و ڕۆژهەڵاتی سوریا.


کەمپەینی هاواری نیشتیمان بۆ هاوکارییکردنی خەڵکی ئاوارەبووی دەستی هێرشەکانی دەوڵەتی تورک لە باکور و ڕۆژهەڵاتی سوریا، لەبەرامبەر پارکی شانەدەری شاری هەولێر، بەردەوامیی هەیە، ڕۆژانە توێژە جیاوازەکان لە منداڵی دایەنگەکانەوە تا دەگاتە تەمەنی خانەنشینیی سەردانی کەمپەینەکە دەکەن و هاوکارییەکانیان پێشکەش دەکەن.

ئەمڕۆش بەشێک لە منداڵانی دایەنگەکانی هەولێر، بە هاوکاریی دادەکانیان هاوکارییەکانیان گەیاندە کەمپەینەکەوە، و دڵخۆش بوون، کە ئەوانیش توانیویانە هاوشێوەی گەورەکەن هاوکاریی منداڵانی باکور و رۆژهەڵاتی سوریا بکەن.

هەروەها، ژمارەیەکی زۆر لە خوێندکارانیش کۆمەکیان گەیاندە کەمپەینەکە.

رێژنە  سەیفەدین، یەكێك لە خوێندكارانی خوێندنگای بینایی كچان، كە ئەمرۆ بە هاوكاریی هاو پۆلەكانی و مامۆستاکانی هاوکاریی گەیاندبووە کەمپەینەکە، بە ڕۆژنیوزی وت: دەستخۆشیی لە پەروەردەی هەولێر و بەڕێوبەرەکەمان دەکەم، کە هاوکارمان بوون، داواش لە هەموو خوێندکاران دەکەم، هاوشێوەی ئێمە هاوکاریی پێشکەش بە خوشک و براکانمان بکەن لە ڕۆژئاوا.

ش.ف