مادده‌ی هۆشبه‌ر هه‌ڕه‌شه‌ له‌ دانیشتوانی خورماتوو ده‌کات 

دانیشتوانی شارۆچکه‌ی خورماتوو، هۆشداری له ‌بڵاوبونه‌وه‌ی مادده‌ی هۆشبه‌ر ده‌ده‌ن و ئاماژه‌ به‌وە ‌ ده‌که‌ن، ئه‌گه‌ر بێتو ڕێگیری لێ نه‌کرێت دوور نیه‌ کاره‌ساتی مه‌ترسیداری لێ بکه‌وێته‌وه‌، بەپێی ئامارێکیش تەنها لەمساڵدا ٢٨٠ بازرگانی ماددەی هۆشبەر لەو شارۆچکەیە دەستگیرکراون.


بەپێی ئامارەکان، شارۆچکه‌ی خورماتوو، کە له ‌ڕووی ئیدارییه‌وه‌ سه‌ر به‌ پارێزگای سه‌ڵاحه‌دینه‌، له‌ دوای ڕووداوه‌کانی ١٦ی ئۆکتۆبه‌رەوە، به‌کارهێنان و بازرگانیکردن به‌مادده‌ی هۆشبه‌ر تیایدا زیادی کردووه‌، بە شێوەیەک دیاردەکە چووەتە ناو خوێندنگاکانی ئەو شارۆچکەیەشەوە.

 به‌پێی ئامارێکی دادگای به‌رایی خورماتوو، له ‌سه‌ره‌تای ساڵی ٢٠١٨ تا ئێستا،  ٢٨٠ بازرگان و به‌کارهێنه‌ری مادده‌ی هۆشبه‌ر ده‌ستگیرکراون، هەروەها ئامارێکی قائیمقامییه‌تی خورماتوو ئەوە دەخاتەڕوو، تەنها لەمساڵدا، هه‌شت  ده‌رمانخانه‌ له‌ناو شارۆچکه‌که‌ بە بڕیاری قائیمقام و هێزە ئەمنییەکان داخراون، به‌هۆی ئه‌وه‌ی لەو دەرمانخانانەدا مامه‌ڵه‌ی کڕین و فرۆشتن به‌ مادده‌ی هۆشبه‌رەوە کراوه‌.

عه‌لی حوسێن هاشمی، ئه‌ندامی ئه‌نجومه‌نی شارۆچکه‌ی خورماتوو، بۆ ڕۆژنیوز باسی لەوە کرد، بڵاوبوونەوەی ماددەی هۆشبەر بەو شێوە بەربڵاوە لە خورماتوو، "ده‌ستێکی نادیاره‌ بۆ تێکدانی  ئارامی و پێکه‌وه‌ژیانی نێوان نه‌ته‌وه‌کان"‌، هەروەها وتیشی:"ئه‌وه‌ی به‌کاریده‌هێنیت و بازرگانی پێوه‌ده‌کات ژماره‌یه‌ک مافیان له‌ هه‌رسێ نه‌ته‌وه‌که‌‌، به‌داخیشه‌وه‌ وا بڵاوبوه‌ته‌وه ئەو دیاردەیە‌ کچانیشی له‌ ناوه‌نده‌کانی خوێندن گرتوه‌ته‌وه‌ و پێویسته‌ هه‌موومان ڕێگیری لێ بکه‌ین". 

ئەو ئەندامەی ئەنجومەنی شارۆچکەی خورماتوو ئاماژەی بۆ ئەوەش کرد، لەبارەی ئەو دیاردەیەوە لەگەڵ هێزە ئەمنییەکان قسەیانکردووە و داوایانکردوە لێکۆڵینەوەی چڕ بکرێت بۆ ڕێگرتن لە هێنان و بازرگانیکردن بە ماددەی هۆشبەرەوە، هاوکات داواشیان کردووە لە قوتابخانە و مزگەوتەکانەوە لەوبارەیەوە هۆشیاریی بڵاوبکرێتەوە.

بەبڕوای یوسف گەرمیانی، کە گەنجێکی دانیشتووی خورماتووە، هاتنی میلیشیا شیعەکان و ڕووداوەکانی ١٦ی ئۆکتۆبەر، کە بووە هۆی دروستبوونی بارودۆخی نەخوازراوی شارۆچکەکە، هۆکاری سەرەکین بۆ بڵاوبوونەوەی ماددە هۆشبەرەکان لەناو گەنجانی خورماتوودا.

هەروەها ئەحمەد مەحمود، توێژەری کۆمەڵایەتی، باس لەوە دەکات هۆکاری سەرەکیی بڵاوبوونەوەی ماددە هۆشبەرەکان لە خورماتوو، بوونی هێزی جۆراوجۆرە لەو شارۆچکەیە، هەروەها سەروەرنەبوونی یاسا، دەشڵێت: "له ‌ئێستادا وای لێهاتووه‌ بازگه‌کان هه‌ر که‌سیش ده‌ستگیربکه‌ن، به‌پاره ئازادی ده‌که‌ن، ئه‌و که‌سانه‌شی بازرگانی ده‌که‌ن، بێ ترس له‌ گرتن له‌بازگه‌کان مادده‌ی هۆشبه‌ر دێننه‌ ناو شارۆچکه‌که ‌و بڵاوی ده‌که‌نه‌وه‌".

ئەو توێژەرە کۆمەڵایەتییە هۆکارێکی دیکەی بڵابوونەوەی ماددەی هۆشبەر لەناو گەنجاندا بۆ بوونی بێکاریی دەگەڕێنێتەوە، جەختیش دەکاتەوە ئەگەر بە زوویی ڕێگریی نەکرێت لەو دیارەدەیە، مەترسی هەیە زیاتر تەشەنە بسەنێت. 

ڕۆژنیوز چه‌ند جارێک  په‌یوه‌ندی کرد به‌ عه‌مید حوسێن عه‌لی، به‌ڕێوه‌به‌ری پۆلیسی شارۆچکه‌ی خورماتوو، به‌ڵام ئامادە نەبوو لەوبارەیەوە هیچ لێدوانێک بدات.


 
ک.ک