"هێنانی ماددەی هۆشبەر بۆ هەرێم مەبەستی سیاسیی لە پشتە"

بەگوێرەی ئاماری بەڕێوەبەرایەتی نەهێشتنی ماددە هۆشبەرەکان لە سلێمانی، لە ماوەی ٤١ڕۆژدا ١٥ بازرگانی ماددەی هۆشبەر دەستگیر كراون، بەڕێوەبەری بەڕێوەبەرایەتیەكەش دەڵێت"گومانمان هەیە ماددە هۆشبەرەكان بەرەو شوێنی دیكە بڕوات، چونكە لە هەرێم هەمووی ساغ نابێتەوە"، شارەزایەكی دەروونییش دەڵێت: هێنانی ماددەی هۆشبەر بۆ هەرێم مەبەستی سیاسیی لە پشتەوەیە.


بەپێی ئامارێكی بەڕێوەبەرایەتی نەهێشتنی ماددەی هۆشبەر، لە سنووری پارێزگای سلێمانی، لە ١/کانوونی دووەمی ٢٠١٩ەوە تا ١٠/شوباتی٢٠١٩،  ١٥ كەس كە بازرگانییان بەماددەی هۆشبەرەوە كردووە دەستگیر كراون، دەستیشگیراوە بەسەر كیلۆیەك شیشە، ١٠٤ گرام حەشیش، شەش پارچە تریاك لەگەڵ چەندین دەمانچە و كڵاشینكۆف دا.

جەلال ئەمین، بەڕێوەبەری بەڕێوبەرایەتی نەهێشتنی ماددەی هۆشبەر لە سلێمانی، لەبارەی بازرگاننای ماددەی هۆشبەرەوە زانیاریی دایە ڕۆژنیوز و وتی: بازرگانان لە تەمەنی ١٨ تا ٥٠ ساڵن، بەڵام بەکارهێنەران تەمەنی خوار ١٨ ساڵیشی تێدایە، لەناو دەستگیر كراوەكانیش جگە لە كورد، فارس و عەرەب و توركیش هەن.

"دەبێتە مەترسییەكی گەورە بەسەر باشوری كوردستانەوە"

ئەو بەڕێوەبەرە گومانی خۆشی نیشاندا لەوەی ئەو بڕە زۆرەی ماددەی هۆشبەر هەمووی لە هەرێمی كوردستان ساغبكرێتەوە و وتی "گومان دەكەین بە سەرماندا تێپەڕبێت و بەرەو شوێنێكی دیكە بڕوات، لەو پێناوەشدا دەبێت وریا بین، چونكە بەو شێوەیە بڕوات دەبێتە مەترسییەكی گەورە بەسەر باشوری كوردستانەوە، ئەگەرچی تا ئێستا حاڵەتە"، ئاماژەی بۆ ئەوەشكرد، خەڵكی باشوری كوردستان زیاتر لە ٩٩% یان بەكارهێنان و بازرگانییكردن بەماددەی هۆشبەرەوە ڕەتدەکەنەوە.

"زۆرینەی بەكارهێنەران گەنجانن"

دەربارەی هۆكارەكانی بەكارهێنانی ماددەی هۆشبەر، سامان سیوەیلی، پسپۆڕی دەروونی، بە ڕۆژنیوزی وت: لەبەرئەوەی زۆرینەی بەكارهێنەران گەنجان و هەرزەكارانن، بۆیە بەكارهێنەر وەك حەزێكی لاسایی كردنەوە، تاقیكردنەوە و خۆ لەبیركردن بەكاری دەهێنن، كە بە داخەوە هەڵە تێگەیشتوون، چونكە كە وادەزانن بۆ لە بیركردنی كێشە و خەمەكانە، كە هەموو ئەمانە نازانستیین و دوورن لە ڕاستیی، هەروەها خێزانەكانیش كەمتەرخەمن لە ئاستی منداڵەكانیاندا بەوەی لێیان ناپرسنەوە.

"دووژمنان بە پیلان دەیهێننە ناو وڵاتی ئێمەوە"

ئەو شارەزا دەروونییە، پێیوایە "ئەو ماددە هۆشبەرەی دێتە هەرێمی كوردستان مەبەستی سیاسی لە پشتە و دووژمنان بە پیلان دەیهێننە ناو وڵاتی ئێمەوە، چونكە تا ساڵی ۱۹۹۲ هەرێمی كوردستان یەكێك بوو لە پاكژترین هەرێمەكان بەهۆی ئەوەی كە نە بەرهەمهێنەر و نە بەكاربەری ئەوماددانەش نەبووە، بەڵام ئێستا پێچەوانەیە و لە ساڵی ۲۰۰۳ٚوە بەرهەمیش دەهێنرێت، جگە لەوەی ناوچەیەكی گوازراوەشە و لێرەوە دەڕواتە ئوردن و وڵاتانی ئەوروپا، ئەگەر واش درێژە بكێشێت سامانێكی گەورە لە دەست دەدەین".

"دەبێت سنوورەکان تۆکمەتر بکرێن"

بە بۆچوونی سامان سیوەیلی، پێگەی جوگرافیی باشور و كاریگەریی دراوسێكانی بەسەرییەوە هۆكارە بۆ زیادبوونی حاڵەتەكانی بەكارهێنان و بازرگانییكردن بەو مادانەوە، وتیشی: ئەگەرچی شوێنی تایبەت بە بەرەنگاربوونەوە ی ئەو ماددانە هەیە، بەڵام دەبێت پلانی گەورەتر هەبێت، دامودەزگای بەهێزتر و سنوورەكانیش تۆكمەتر بكرێت.

"ڕێنمایی باش بدەنە هاوڵاتیان و خوێندکاران"

سامان سیوەیلی، پسپۆری دەرونیی، بە ئەرکی مامۆستایان ئاینیی، دەزگاكانی ڕاگەیاندن، وەزارەتی پەروەردە و مامۆستاكانی دەزانێت، كە ڕێنمایی باش بدەنە هاوڵاتیان و خوێندكاران لەو ڕووەوە، وتیشی: دەبێت خێزانەكان چاودێرێكی باش بن بە سەر منداڵەكانیانەوە، ئەگەر نا ئەم پرسە بەو شێوەیە بەردەوام بێت دەبێتە دیاردە.

ك.س