هەرێم، لە ٦ مانگدا ١٢ کرێکار لە شوێنی کارەکانیان گیانیان لەدەستداوە

لەماوەی شەش مانگی سەرەتای ئەمساڵدا لە هەرێمی کوردستان، ١٢ کرێکار لە شوێنی کارەکانیان گیانیان لەدەستداوە کە دوو لەو کرێکارانە بیانی بوون.


لقی هەولێری سەندیكای كرێكارانی كوردستان، ڕایدەگەیەنێت، بەراورد بە شەش مانگی سەرەتای ساڵی ڕابردوو لە سنوری پاریزگای هەولێر گیان لەدەستدانی کرێکاران لە شوێنی کارەکانیان بەرزبووەتەوە، بە گشتیش لە هەرێمی کوردستان، ١٢ کرێکار لە شوێنی کارەکانیان گیانیان لەدەستداوە.

بەپێی ئاماری لقی هەولێری سەندیكای كرێكارانی كوردستان، لە ماوەی شەش مانگی سەرەتای ئەمساڵدا لە شاری هەولێر ٢ کرێکار کە یەکێکیان بیانییە، لە سلێمانی یەک کرێکار، لە دهۆک ٤ کرێکار و لە گەرمییان ٥ کرێکار کە یەکێکیان بیانییە لە شوێنی کارەکانیان گیانیان لەدەستداوە.

حەسەن ڕەمەزان، بەڕێوەبەری ڕاگەیاندنی لقی هەولێری سەندیكای كرێكاران بە ڕۆژنیوزی ڕاگەیاند، لە ماوەی شەش مانگی ڕابردووی سەرەتای ئەمساڵدا لە سنوری پارێزگای هەولێر دوو كرێكار گیانیان دەستداوە، کە یەكێكیان بە ڕەگەز بەنگلادشیی،. ئەوەش لە کاتێکدایە لە شەش مانگی سەرەتای ساڵی ڕابردوودا تەنها یەک کرێکار گیانی لەدەستداوە.


وتیشی: هەوڵەكانی سەندیكای كرێكاران بەردەوامن بۆ ئەوەی ڕووداوەكانی كار كەمتر بكرێنەوە، لەو چوارچێوەیەشدا لە بەرنامە و پلانی كاركردنماندایە ڕێوشێونی زیاتر بەرامبەر بە خاوەنكارەكان بگرینەبەر بۆئەوەی لە شەش مانگی ساڵی داهاتوو بتوانین لە ئامارەكاندا هیچ ڕووداوێک تۆمار نەكرێت.
لەبارەی داواكارییەكانی سەندیكای كرێكاران كە ڕۆژی یەكی ئایار لە یاداشتێكی پێنج خاڵیدا كۆمەڵێك داواكارییان ئاراستەی پەرلەمانی هەرێمی كوردستان كرد، ئەو بەرپرسەی سەندیكای كرێكاران ئاماژەی بەوەکرد کە "بەداخەوە تاوەكو ئێستا پەرلەمانی هەرێمی كوردستان وەڵامی داواكارییەكانی ئێمەی نەداوەتەوە، ئەگەر هەربەمشێوەیە بێ وەڵامبن ئەوە ڕێكاری دیکەی مەدەنیانە دەگرینەبەر بۆ ئەوەی بتوانین داوكاری كرێكاران جێبەجێی بكەین كە دیارترین خاڵەكانیش هەمواركردنەوەی یاسای كار و دابینكردنی بیمەیە بۆ كرێكاران.

ک.س