کۆمپانیایەک سەرجەم گرێبەستەکانی لەگەڵ کۆمپانیا تورکییەکان ڕاگرت

وەک هەڵوێستێکی نەتەوەیی و دژ بە هێرشی وەحشیگەرانەی دەوڵەتی تورک بۆسەر باکور ڕۆژهەڵاتی سوریا، کۆمپانیای دوکانی فۆرس لە هەرمی کوردستان سەرجەم مامەڵە و گرێبەستەکانی بە بەهای زیاتر لە ٤٥٠ هەزار دۆلار لەگەڵ کۆمپانیا تورکییەکان ڕاگرت.


تا دێت کاردانەوە ناوخۆییەکان دژ بە دەوڵەتی داگیرکەری تورک زیاتر دەبێت و دوای ڕاگرتنی گەشت بۆ جەند وڵاتێک لەلایەن کۆمپانیا گەشتیارییەکانی هەرێمی کوردستانەوە، کۆمپانیایەکی دیکۆراتیش سەرجەم گرێبەستەکانی لەگەڵ کۆمپانیا تورکییەکان راگرت.  

عەبدولواحید دوکانی، خاوەنی کۆمپانیای دوکانی فۆرس Dwkane force، لە پەڕەی تایبەتی خۆی لە تۆڕی کۆمەڵایەتیی فەیسبووک نووسیوێتی:"وەک هەڵوێستێکی نەتەوەیی و دژی ئەو وەحشیگەراییەی تورک لەگەڵ ڕۆڵەکانی میلەتەکەمان، وەکو یەکەم کۆمپانیای هەرێمی کوردستان لە ئەمڕۆوە ( دوکانی فۆرس Dwkane force ) سەرجەم مامەڵەو کڕینی دیکۆرات و کەلوپەلە تورکیەکانمان کە هەمان بوو بۆ دابینکردنی دەرگا و کەلوپەل و دیکۆرات بە بڕی زیاد لە 450000 چوارسەد و پەنجا هەزار دۆلار راگرت".

ئەوەشی نووسیوە:"هەتا ئەمڕۆ دووان لە ترێلە بارکراوەکانیشمان، کە بڕیاربوو ئەمڕۆ بەڕێ بکەون بۆ سلێمانی، لە ئەستەنبوڵ بەتاڵکردەوە، مردن و سەرشۆڕی بۆ دوژمنانی کورد ، سەربەرزی بۆ گەلی کورد لە هەر شوێنێکی دنیا".

 

ش.ف