کۆڕبه‌ندی کۆمه‌ڵایه‌تی بەشداریی ژنی لە سیاسەتدا تاوتوێكرد

له ‌زانکۆی سلێمانی، دووه‌مین کۆڕبه‌ندی کۆمه‌ڵایه‌تیی کوردستان دەستیپێكرد، دوو ڕۆژ به‌رده‌وام ده‌بێت و پرسەكانی ئازادیی ڕاده‌ربڕین، به‌شداریی ژنان له‌ ناوه‌نده‌کانی بڕیار، پاراستنی ژینگە و سه‌رچاوه‌کانی ئاو و چەند پرسێكی دیكە تاوتوێدەكرێن و لەداهاتوودا كاریان لەسەردەكرێت.


ئەمڕۆ، دووەمین کۆڕبەندی کۆمه‌ڵایه‌تیی کوردستان، بە هاوبەشیی هەریەکە لە زانکۆی سلێمانی و کۆڕبەندی کۆمەڵایەتیی عێراق، لەژێر دروشمی 'کوردستانێکی تر لە توانا هەیە' دەستیپێكرد، پرسەكانی ڕه‌وشی ئاواره‌کان، ئازادی ڕاده‌ربڕین، به‌شداری ژنان له‌ ناوه‌نده‌کانی بڕیار، پاراستنی ژینگە و سه‌رچاوه‌کانی ئاو و چەند پرسێكی دیكە تاوتوێدەكرێن.

لە کۆڕبەندییەکەدا پلانێکی هاوبه‌ش دادەنرێن له‌ نێوان لایه‌نه‌کان و ڕێکخراوه‌کانی کۆمه‌ڵگه‌ی مه‌ده‌نی و ئه‌و دامەزراوانەی به‌شدارده‌بن له‌ کۆڕبه‌ندەکه، بۆ كاركردن لەسەر ئەو پرسانەی كۆڕبەندەكە تاوتوێیان دەكات.

یەكێك لەو پانێڵانەی ئەمڕۆ بەڕێوەچوون تایبەت بوو بە پرسی 'به‌شداری سیاسیی ژن له‌ بڕیاردان' به‌ به‌شداری پانێڵیستان 'تارا حسێن، په‌یمان عیزه‌دین، سه‌یران ئه‌حمه‌د، ئاشتی عه‌بدوڵا'، تێیدا باس له‌ گرنگیی به‌شداری ژن لە پرسە سیاسییەكان و بڕیاردان کرا، ئه‌و هۆکارانەش‌ خرانه ڕوو که‌ و‌اده‌کەن ڕێژه‌ی به‌شداریی ژن له‌ بڕیارە سیاسییەكاندا که‌مبێت.

په‌یمان عزه‌دین پارێزه‌ر، که‌ یه‌کێک بوو له‌ پانێڵیسته‌کان، باسی له‌وه‌ کرد، که ڕێژەیکی باشی ژن له‌ سیاسه‌تدا بەشدارن، بەڵام بەشداریی ژن له‌ بڕیارداندا لەناو پارتەكاندا لە ئاستێكی خراپدایە، چونكە تێڕوانینی پارتەكان و بڕیاربەدەستانی باشوری كوردستان ژن تەنها بۆ ڕواڵەت و جوانکاری پارتەكانیان به‌کارده‌هێنن.

دواتر تارا حسێن، جێگری هاوسەرۆکانی تەڤگەری ئازادی، باسی له‌وه‌کرد، که کلتوری پیاوسالاری له‌ پشت ئه‌م بێئیرادەییه‌ی ژنه‌وه‌یه‌، پرسی ژنیشی بە پرسێكی سه‌ره‌کی و ناوه‌ندیی کۆمه‌ڵگه‌ ناوبرد، پێشی وابوو که‌ ئه‌گه‌ر کۆتا نه‌بووایه‌ ئه‌وا ئه‌و ڕێژەیە‌ی ژن له‌ په‌رله‌ماندا نه‌ده‌بوو كە ئێستا هەن.

دکتۆر سه‌یران ئه‌حمه‌د مامۆستای زانکۆ، یەكێكی تر بوو لە پانێڵیستەكان، ئاماژه‌ی به‌وه‌کرد، که‌ کلتور و بیرکردنه‌وه‌ی کۆمه‌ڵگا هۆکارن بۆ ئه‌وه‌ی ڕێژه‌ی ژن له‌ سیاسه‌تدا که‌م بێت، باسی له‌وه‌ش کرد که‌ سیاسه‌ت بووه‌ به‌ به‌شێک له‌ بازرگانی، ئه‌گه‌ر جیابکرێته‌وه،‌ ئه‌وکات‌ توانای ژنان و پیاوان ده‌رده‌که‌وێت.

ئاشتی عه‌بدوڵا چالاکوانی مه‌ده‌نی، دوا پانێڵیست بوو، ئاماژه‌ی به‌وەکرد، كە بۆ کۆمه‌ڵگایه‌کی دیموکرات پێویستمان به‌ به‌شداریی کارای ژنه‌ له‌ سیاسه‌تدا، باسی له‌ سێ هۆکاری سه‌ره‌کیی کرد كە وایانكردووە به‌شداریی ژن له‌ سیاسه‌تدا كەمبێت، ئه‌وانیش سیستمی سیاسیی پیاوسالاری، خودی ژنان خۆیان، هه‌روه‌ها کلتوری کۆمه‌ڵگه‌، سیستمی کۆتای بۆ بارودۆخه‌ی ئێستای کوردستان بە گونجاو زانی‌.

ئەمڕۆ، جگە لەم پانێڵەی تایبەت بە بەشداریی ژنان لە بڕیاری سیاسی، چەند پانێڵێكی دیكە بەڕێوەچوون بە ناونیشانەكانی 'میدیا و پاڵپشتیی دیموكراسی، پاراستنی ئاوارەكان و كەمینەكان لە هەرێم، پاراستنی ئاو و ڕووبارەكانی میزۆپۆتامیا، هەڵمەتی دادپەروەری لە كوردستان، ڕەوشی كرێكاران و ئازادی كاری سەندیكایی'.

سبەینێش كۆڕبەندەكە بەردەوام دەبێت و ئەنجامی وۆركشۆپ و كاری گروپەكانی كۆڕبەندەكە لەسەر پانێڵەكانی ڕۆژی یەكەم دەخرێنەڕوو، بۆئەوەی كاریان لەسەر بكرێت.

س.ح