گەنجانی قەسرێ باسی کاری خۆبەخشیی دەکەن

ناوه‌ندى ڕۆشنبیرى قه‌سرێ له‌ژێر ناونیشانى "گرنگیی کاری خۆبه‌خشیی و ئامانجه‌کانی ناوه‌ندی ڕۆشنبیریی قه‌سرێ"، سیمینارێکیان ئەنجامدا و تێیدا باسی کاری خۆبەشییان کرد، سیمینارەکەش سەرەتای دەستکردن بە کارکردن بوو، وەک ڕێکخراوێکی خۆبەخشانە.


ئێوارەی ئەمڕۆ ناوه‌ندى ڕۆشنبیرى قه‌سرێ له‌ هۆڵى ناوه‌نده‌که‌یان، وۆرک شۆپێکیان ڕێکخست و تێیدا چه‌ندین چالاکوان و ژنان و توێژه‌کانى شاره‌دێى قه‌سرێ سەربە پارێزگای هەولێر، ئامادە بوون.

له ‌سه‌ره‌تادا ڕێباز وسو، ئه‌ندامى ده‌سته‌ى به‌ڕێوەبه‌رى ناوه‌ندى ڕۆشنبیرى قه‌سرێ،‌ ئامانجه‌کانى ناوەندەکەی بۆ ئاماده‌بووان شیکرده‌وه‌ و تێیدا باسى له‌ کار و چالاکى داهاتووى ناوه‌نده‌که‌ کرد بۆ ئاماده‌بووان و وتى: چالاکیه‌کانمان جگه‌ له‌ پاڵپشتى بۆ ویست و داوا و داخوازیه‌کانى خه‌ڵکى ناوچه‌که،‌ چه‌ندین چالاکى په‌یوه‌ست به‌ په‌ره‌پێدانى تواناکانى ژنان و گه‌نجان ئەنجام دەدەین، هەروەها کار لەسەر لایه‌نى کولتورى و هونه‌ریى و فه‌رهه‌نگى و ژینگه‌یی دەکەین.

ڕێباز داواشی کرد، که‌ ژنان و گه‌نجان و چالاکوانانى ناوچه‌که‌ بەشدار و هاوکار بن بۆ سه‌رخستنى ئامانجه‌کانیان، "چونکه‌ ئێمە ته‌نیا وه‌ک گه‌نجانى خۆبه‌خش ده‌ستمان به‌و کاره‌ کردووه".

دواتر فه‌رهه‌نگ عەبدولڕەحمان، چالاکوان، کارى خۆبه‌خشیى شیکردە‌وه ‌و چه‌ند خوله‌کێک له‌سه‌ر کارى خۆبه‌خشیی دوا و دواتر له‌لایه‌ن ئاماده‌بووانه‌وه‌ چه‌مکى خۆبه‌خشى و کارى خۆبه‌خشى شیکرایه‌وه‌ و بابه‌ته‌که‌ زیاتر باس کرا و بەڵێنی کاری پێکەوەیی و خۆبەخشیان دا.


ک.ک