تەنیا چەند کەسێکی کەم یادی شەهیدانی بینا سووتاوەکەی سیروان-یان کردەوە، بەڕێوەبەری بەڕێوەبەرایەتیی شەهیدان و ئەنفالکراوانی هەڵەبجەش، هۆکارەکەی دەگەڕێنێتەوە بۆ پابەند بوون بە ڕێنماییە تەندروستتییەکانەوە.
ئەمڕۆ ساڵیادی شەهیدانی بینا سووتاوەکەی سیروان بوو، کە ٣٤ ساڵ بەر لە ئێستا و لەکاتی شەڕی نێوان عێراق ئێران-دا، بەشێک لە هاوڵاتیانی هەڵەبجە و هەورامان لەناو بینای خوێندنگایەکی شارەدێی سیروان-دا خۆیان حەشار دا، بەڵام بەر تۆپی دەوڵەتی ئێران کەوت و نزیکەی ٢٠٠ هاوڵاتی شەهیدبوون و ٥٠ی دیکەش بریندار بوون.
ساڵانە بە مەراسیمی تایبەت ئەو یادە دەکرایەوە، بەڵام ئەمساڵ تەنیا بەشێک لە کارمەندانی مۆنۆمێنتی هەڵەبجە و بەڕێوەبەرایەتیی کاروباری شەهیدان، لەناو بینا سووتاوەکەدا و بە چەند خولەکێک وەستان بە بێدەنگیی، یادی شەهیدانی ئەو کۆمەڵکوژییەیان کردەوە.
كامەران مستەفا، بەڕێوەبەری بەڕێوەبەرایەتی کاروباری شەهیدان و ئەنفالكراوان لە هەڵەبجە، بە ڕۆژنامەنووسانی ڕاگەیاند: ئێمە هەموو ساڵێك یادی ئەو شەهیدانە بەرز ڕادەگرین، بەڵام ئەمساڵ بەهۆی پاپەندبوون بەڕێنماییەكانی وەزارەتی تەندروستیی و ناوخۆ، هیچ مەراسیمێكمان ئەنجامنەدا.
لای خۆشیەوە هێمن حەمەحسێن، بەڕێوەبەری شارەدێی سیروان بە ڕۆژنیوزی وت: ئەم بینایە لەم ساڵانەی ڕابردوودا كۆمەڵێك وێنەی یادەوەری تێدا هەڵواسراوە، بەڵام بەهۆی نەبوونی كارمەندەوە دەرگاكەی بەردەوام داخراوە، ئەگەر میوانێكیش بێت ناتوانین بیهێنینە ئێرە، هیواداریشین لەناو بیناكەدا هۆڵێكی شایستە بكرێتەوە بۆ ئەوەی یادەكەی تێدا بكەینەوە.
بەڕێوەبەری شارەدێی سیروان، داواشیکرد، هەموو ئەو ئیمتیازاتانەی كەسوكاری شەهیدان هەیانە، بە کەسوکاری ئەم شەهیدانەش بدرێت، وەك پێدانی خانوو، زەوی و دامەزراندن، وتیشی: تەنها بەبڕە پارەیەكی كەمی شەهیدانەیان بۆ كراوە، بەهۆی ئەوەی گلەییان لە حکومەت هەیە، كەسوكاری شەهیدان وەك پێویست بەشداریی لەیادەكەدا ناكەن.
بینا سوتاوەكە قوتابخانەیەكی تەوا نەكراو بوو لەو كاتەدا، چەندین كابینەی حكومەت گۆڕاوە، تائێستا نەتوانراوە بكرێتە مۆنۆمێنتێكی شایستە بۆ ئەوەی خەڵكی سەردانی بكات، تەنها چەند ژوورێكی نەبێت وێنەو ناوی بەشێك لەشەهیدەكانی تێدا هەڵواسراوە.
ش.ف
