لە شارۆچكەی شەقڵاوەی سەر بە پارێزگای هەولێر، ساڵانە زیاتر لە ١٥ تۆن نانە قەیسی بەرهەم دەهێنرێت، جگە لە نانە قەیسیش بەرهەمەكانی وەك سركەی هەنار و دۆشاوی ترێ و باسوق و سجوق و هەنجیر و دەیان جۆر بەرهەمی شیرنەمەنی دروست دەكرێت.
شەقڵاوە یەكێكە لە شارۆچكە گەشتیاریەكانی سنووری پارێزگای هەولێر، ساڵانە گەشتیارێكی زۆر لەشارەكانی هەرێم و باشور و ناوەڕاستی عێراق سەردانی ئەوشارە دەكەن و ئابووری ئەو شارەیان بوژاندۆتەوە ، جگە لەوەش كاڵاو شمەكی ئەو شارە دەچێتە شارەكانی دیکەی عێراق و بەرهەمهێنانی بەرهەمە خۆماڵیەكانی ڕوو لەزیادبوون كردووە.
لەناوەڕاستی بازاڕی شەقڵاوە دوكانی مام حاجی هەیە کە پڕیەتی لە بەرهەمی ناوخۆیی و بەدەستی خۆیان باسوق و سجوق و نانەقەیسی و ئاوی بنێشتی كوردی و سركەو شەربەتی هەنار و دۆشاوی ترێ و مێوژ و مرەبای هەمەجۆر دروست دەكەن.
دوكانەکەی مام حاجی ئێستا ئاوی بنێشتی كوردی بەشێویەكی سروشتی بەرهەم دەهێنێت و هەفتانە ٥٠٠ بوتڵی لێ دەفرۆشێت، لە ئێستاشدا سەرقاڵی ئەوەن هەناردەی شارەكانی تری عێراق و دەرەوەی عێراقیشی بكەن.
مستەفا، خاوەنی دوکانەکەیەو دەڵێت، جگە لە بەرهەمە شیرینیەكان، دوكانەكەی ئەوان بایەخی زۆر دەدات بە بەرهەمهێنانی ئاوی بنێشتی كوردی، ئەوان بنشێتی دارەبەن لە شوانەكان دەكڕنەوەو بە چەند قۆناغێك دەیكەن بە ئاوێكی شل و لەناو بوتڵ هەڵیدەگرن.
خالید ئەحمەد، یەكێكی ترە لە خاوەن دوكانەكانی بازاڕی شەقڵاوە و جۆرەها شیرنەمەنی و لوقمیان لە قەیسی و كونجی و قەزاون و هەنجیرو بەروبومەكانی تر دروست كردووە، دەڵێت، ‘زۆرینەی بەرهەمەكانیان ناوخۆیین و بەتایبەت لە شەقڵاوە بەرهەم دەهێنرێن، دوپاتیشیدەکاتەوە كەمترین بەرهەم هاوردە دەكەن’.
بە وتەی خالید بەراورد بە چەند ساڵی ڕابردوو بازاڕیان ڕووی لە كزی كردووە بەتایبەت ئەمساڵ بەهۆی قەدەغەی هاتووچۆو نەهاتنی گەشتیاران زیانی زۆریان كردوەو بەرهەمێكی زۆریان بەفیڕۆچووە.
شەقڵاوە، وەك یەكێك لە شارە گەشتیارییەكان، ناوچەی پێكەوە ژیانی مەسیحی و موسڵمانەكانیشە، دەیان ساڵە ئەم دوو ئایینە جیاوازە بەبێ كێشە لەم شارەدا پێكەوە دەژین، هەردوولا پێكەوە نازناوی گەشتیاریی شەقڵاوەیان پاراستووە و بایەخیان بۆ بەرهەمە خۆماڵییەکان پەیداکردووە.
ی. ک
