شەوی ڕابردوو دووەم کۆبوونەوەی شاندی هەرێم لەگەڵ لیژنەی دارایی عێراق بەڕێوەچوو، تێیدا گفتوگۆ لەبارەی داهاتە نەوتیی و نانەوتییەکانی هەرێمەوە کراوە، ئەندامێکی لیژنەی دارایی عێراقیش ئاشکرای دەکات: ئەندامانی لیژنەی دارایی عێراق لە شاندەکەی هەرێمیان پریسیوە، کە ئاخۆ دەسەڵاتی ڕادەستکردنی نەوتیان هەیە؟
کۆبوونەوەی شەوی ڕابردووی شاندی هەرێم لەگەڵ لیژنەی دارایی پەرلەمانی عێراق بەسەرۆکایەتیی قوباد تاڵەبانی بەڕێوەچووە، سەمیر هەورامی، وتەبێژی قوباد تاڵەبانی بە ڕۆژنیوزی ڕاگەیاند: لە كۆبوونەوە‌كە‌دا بە‌وردی گفتووگۆ كرا لەبارەی داھات و خە‌رجییە‌كان بە ژمارە و ھە‌موو ئەو داتا و زانیاریانەی ھە‌رێمی كوردستان كە پێوست بوون بۆ لیژنەی دارایی پەرلەمانی عێراق خرانە‌ڕوو.
کۆبوونەوەکەی لیژنەی دارایی پەرلەمانی عێراق بەبێ ئامادەبوونی نوێنەرانی هاوپەیمانی هیوای کوردستانی لە لیژنەی دارایی و هەیسەم جبوری، سەرۆکی لیژنەکە بەڕێوەچووە، ئەندامێکی لیژنەی داراییش کە نەیویست ناوی بڵاوبکرێتەوە بە ڕۆژنیوزی ڕاگەیاند: لە کۆبوونەوەکەدا هیچ قسەیەکی کۆنکرێتی نەکراوە لەبارەی پشکی هەرێم و تەنها گفتوگۆ دەکرێت لەسەر ڕادەستکردنی نەوت و داهاتەکان.
ئەو پەرلەمانتارە کە ناوەکەی لای ڕۆژنیوز پارێزراوە، ئەوەشی خستەڕوو: ئەندامانی لیژنەی دارایی پەرلەمانی عێراق لە شاندەکەی هەرێمیان پرسیوە، ئایا ئێوە دەسەڵاتی ڕادەستکردنی نەوت-تان هەیە؟.
بەوتەی ئەو پەرلەمانتارە: تێگەیشتنێکی گشتگیر لای پەرلەمانتارە عەرەبەکان گەڵاڵە بووە، کە مەسروور بارزانی نایەویت بگاتە ڕێککەوتن بۆیە خۆی نایەت بۆ بەغدا، ئەگەر بیانویستایە ڕێکبکەون ئەوا مەسرور بارزانی خۆی دەهات بۆ بەغدا.
پێشتر جەمال کۆچەر، ئەندامی لیژنەی دارایی ئەنجومەنی نوێنەرانی عێراق باسی لە خاڵێکی سەرەکیی ناکۆکییەکانی نێوان هەولێر و بەغدا بۆ ڕۆژنیوز کردبوو، کە بریتییە لە نرخی نەوتی هەرێمی کوردستان.
بەوتەی ئەو پەرلەمانتارە: بەغدا دەڵێت ئێمە داهاتی نەوتمان دەوێت بەو نرخەی کە کۆمپانیای سۆمۆ دەیفرۆشێت، هەرێمیش دەڵێت ئێمە داهاتی نەوت بەو نرخە ڕادەست دەکەین کە خۆمان دەیفرۆشین، بەغداش دەڵێت دەبێت بەو نرخە ڕادەستی منی بکەیت کە من دەیفرۆشم، جیاوازیی لە نێوان هەردوو نرخەکەی هەولێر و بەغدا بۆ هەر بەرمیلێک ٢٠ دۆلارە.
جەمال کۆچەر دەشڵێت: کرێی گواستنەوەی هەر بەرمیلێک نەوتی هەرێم ١١ دۆلارە، بەڵام کرێی گواستنەوەی نەوتی عێراق تەنها یەک دۆلار و ٤٧ سەنتە، بەکۆی گشتیی ٦٠٪ بۆ ٧٠٪ی داهاتی نەوتی هەرێم بۆ کۆمپانیاکانە، بەڵام تەنها ٢٠٪ی داهاتی نەوتی عێراق دەچێت بۆ کۆمپانیاکان.
س.ح
