پرۆژە یاسای بوجەی فیدراڵ ئەمڕۆ لە ئەنجومەنی نوێنەرانی عێراق دواخرا بۆ ڕۆژی سێ شەممەی داهاتوو، شاندە هونەریەکەی حکومەتی هەرێم دووبارە بە دەستی بەتاڵ گەڕانەوە هەولێر کە ماوەی سێ ڕۆژە لە بەغدان، عێراق مەرجی هەیە بۆ جێکردنەوەی پشکی هەرێم لە پرۆژە یاسای بودجە و حکومەتی هەرێمیش دووپاتیدەکاتەوە سازش لە ماف و شاییستە داراییەکانی هەرێم ناکات.
لە کۆبوونەوەی ئەمڕۆی ئەنجومەنی نوێنەرانی عێراقدا گفتوگۆکردن لەسەر پرۆژە یاسای بوجەی فیدراڵ دواخرا بۆ ڕۆژی سێ شەممەی داهاتوو، بۆ ئەوەی سەرەتا لە کۆبونەوەی ئەنجومەنی وەزیراندا بڕیاری لەسەر بدرێت کە تا ئێستا وەزارەتی دارایی نەیتوانیوە چوارچێوەیەک بۆ خەرجییەکان دیاری بکات و کورتهێنانێکی ئاسایی هەبێت، هەرچی پەیوەستە بە هەرێمیشەوە کە بە وتەی پەرلەمانتارێکی کورد، تا ئێستا هیچ ڕێکەوتنێک نەکراوە جگە لە تاوتوێکردنی دوو پێشنیار کە یەکێکیان ڕادەستکردنی ٢٥٠ هەزار بەرمیل نەوت و نیوەی داهاتی گومرگەکانە کە هەرێم خۆی خەرجی کۆمپانیاکان لە ئەستۆ بگرێت، دووەم پێشنیاریش ڕادەستکردنی ٤٥٠ هەزار بەرمیل نەوت و نیوەی داهاتی گومرگەکانە بەمەرجێ عێراق خەرجی کۆمپانیان بدات.
ئەحمەد حاجی ڕەشید، ئەندامی لیژنەی دارایی لە ئەنجومەنی نوێنەرانی عێراق لە ڕاگەیەنراوێکدا دەڵێت، “مەرج نییە هەردوو پێشنیارەکە لەناو پەرلەماندا دەنگیان لەسەر بدرێت، بەهۆی بێبەڵێنی حکومەتی هەرێمەوە لە ڕێکەوتنەکانی پێشوودا، هەربۆیە شاندەکەی هەرێم نامەیەکیان هێناو نامەیەکیان لەگەڵ خۆیان بردەوە”.
هەر ئەمڕۆ شاندە هونەریەکەی حکومەتی هەرێم کە ماوەی سێ ڕۆژە لە بەغدان، گەڕانەوە هەولێر و لەگەڵ مەسرور بارزانی سەرۆکی حکومەتی هەرێمدا کۆبوونەوە.
جوتیار عادل، وتەبێژی حکومەتی هەرێم لەوبارەیەوە ڕایگەیاندووە، چاوەڕێی گەیشتنی بەشە بودجەی هەرێمن بۆ مانگی ئۆکتۆبەر کە تا ئێستا حکومەتی فیدراڵی نەیناردووە.
سەبارەت بە ناوەڕۆکی کۆبونەوەکە، وتەبێژی حکومەتی هەرێم دەڵێت، جەخت لەوە کراوەتەوە کە حکومەتی هەرێم بە هیچ شێوەیەک سازش لە ماف و شایستە دارایی و دەستوورییەکانی هەرێم ناکات و چاوەڕێی گەیشتنی بەشە بودجەی هەرێمە بۆ مانگی ئۆکتۆبەر لە لایەن حکومەتی فیدراڵییەوە، کە تا ئێستا نەنێردراوە، ئەمە جیا لە مانگەکانی پێنج و شەش و حەوتی ئەمساڵ.
لەبارەی ڕەشنووسی پڕۆژە یاسای بودجەی فیدراڵیشەوە جوتیار عادل، دەڵێت، لێکتێگەیشتنی باش لە نێوان هەرێمی کوردستان و حکومەتی فیدراڵی هاتووەتەئاراوە، بەڵام گفتوگۆکان بەردەوامن بە ئاراستەی گەیشتتن بە ڕێککەوتنی کۆتایی.
بەڕای پەرلەمانتاران، بەردەوامی گفتوگۆکان لەنێوان هەرێم و بەغدا تەنها کات کوشتنەو لە کۆتاییدا هیچ ئەنجامێکی نابێت، بەوپێیەی هەرێم ناچێتە ژێر باری ڕێککەوتنەکان و جدی نییە لە چارەسەرکردنی پرسی نەوت و سەرچاوەی داهاتەکانی، ئەوەش بۆ فشاری دەوڵەتی تورکیا دەگەڕێننەوە لەسەر هەرێم کە بێ ئاگاداری بەغدا ڕێککەوتنی ٥٠ ساڵییان واژۆ کردووە و لەبری ئابووریی سەربەخۆ، هەرێم کەوتووەتە سەر ساجی عەلی.
ی. ک
