قه‌سه‌ده‌: له‌ ٢٤ كاتژمێری ڕابردوودا ٦ چه‌ته‌ی داعش كوژراون

هێزەکانى سوریاى دیموکرات- قەسەدە، ڕایانگەیاند، کە لە ٢٤ کاتژمێرى ڕابردوودا شەش چەتەى داعش له‌ ڕۆژهه‌ڵاتی ڕووباری فورات كوژراون.


ناوه‌ندی ڕاگه‌یاندنی هێزه‌كانی سووریای دیموكرات- قه‌سه‌ده‌، ڕاگه‌یه‌نراوێكى لە بارەى ئاماری شه‌ڕی ٢٤ كاتژمێری ڕابردووی هه‌ڵمه‌تی گه‌رده‌لوولی جزیرە، بڵاوکردەوە، کە له‌ سنووری دێره‌زۆر به‌ڕێوه‌ده‌چێت.

لە ڕاگەیەندراوەکەى قەسەدە-دا هاتووە، کە چەتەکانى داعش له‌ به‌ره‌ی باغۆز، به‌ چه‌كی ئاڕ پی جی، بی كه‌ی سی، كڵاشینكۆف و قه‌ناس، هەوڵیان داوە هێرش بکەنە سەر هێزەکانى شەڕڤانان، بەڵام شەڕڤانانى قەسەدە وەڵامیان داونەتەوە و هێرشەکەیان تێک شکاندووە.

هەوەرها دەشڵێن، کە لەبەربەیاندا شەڕێکى دیکە لە نێوان شەڕڤانان و چەتەکانى داعش-دا، ڕوویداوە و لە ئەنجامدا شەش چەتەى داعش کوژراون و سێ شەڕڤان بریندار بوون، ده‌ست به‌سه‌ر بڕێكی زۆر چه‌كی تیرۆریستاندا گیراوە، فڕۆكه‌كانی هاوپه‌یمانان له‌ بنكه‌كانی تیرۆریستانیان داوە، له‌ ئه‌نجامدا ڕێگه‌ی نێوان گوندی مورشید و سووسه‌ داخراوە، هه‌روه‌ها كۆگا‌یه‌كی ته‌قه‌مه‌نیی تیرۆریستان ته‌قێندرایه‌وه، له‌ ئه‌نجامی ته‌قینه‌وه‌ی مینێك، كه‌ تیرۆریستان جێگیریان كردبوو، شه‌ڕڤانێك شه‌هیدبوو و یه‌كێكی دیكه‌ش بریندار بوو.

لەکۆتایى ڕاگەیەندراوەکەى قەسەدە-دا، ئامارى گشتى شەڕى ٢٤ کاتژمێرى ڕابردوو خراوەتە ڕوو کە بەم شێوەیەیە، کوژرانى شەش تیرۆرست، فڕۆكه‌كانی هاوپه‌یمانان له‌ چوار شوێنی داعش-یان داوە، مینێك پووچه‌ڵ كراوەتەوە، دۆشكه‌یه‌ك و دوو كڵاشینكۆف، لەگەڵ چه‌كێكی م١٦ و دوو ته‌له‌فۆنی بێ ته‌ل دەستى بەسەردا گیراوە، هەروەها كۆگه‌یه‌كی چه‌ك و ته‌قه‌مه‌نی و شەش ئۆتۆمبێلی تیرۆریستان ته‌قێندراونەتە‌وه‌.

د.ع