عەبادی چەندین بڕیاری بۆ چارەسەری كێشەكانی زیقار دەركرد

حەیدەر عەبادی سەرۆك وەزیرانی عێراق، چەندین بڕیاری بۆ چارەسەركردنی كێشەكانی پارێزگای زیقار دەركرد، كە یەكێك بوو لەو پارێزگایانەی لە چەند ڕۆژی ڕابردوودا خۆپیشاندانی فراوانی لێ‌ بەڕێوەچوو.


شەوی ڕابردوو نوسینگەی ڕاگەیاندنی حەیدەر عەبادی، سەرۆك وەزیرانی عێراق ڕاگەیەندراوێكی بڵاوكردەوە و ئاماژەی بۆ ئەوە كرد، عەبادی لەگەڵ نوێنەرانی زیقار كۆبوەتەوە و چەندین بڕیاری دەركردوە.

لە ڕاگەیەندراوەكەدا ئاماژە بەوە كراوە، عەبادی لە میانی كۆبوونەوەی لەگەڵ كەسایەتی و پیاوماقوڵانی پارێزگای زیقار و بەرپرسانی ئیدارەی خۆجێی پارێزگاكە، ١٤ بڕیاری بۆ چارەسەری كێشەكانی ئەو پارێزگایە دەركردووە، كە ئەمانەن:

١ـ دامەزراندنی فەرمانبەران لە كەرتە جیاوازەكانی پارێزگاكە.

٢ـ خەرجكردنی بەشی پارێزگاكە لە پارەی پترۆدۆلار.

٣ـ بەشە كارەبای پارێزگای زیقار دووبارە پێداچوونەوەی بۆ دەكرێت بەپێی ڕێژەی دانیشتووان.

٤ـ وەزارەتی دارایی پارە بۆ تەواوكردنی پردی نەسڕ و چەند ڕێگایەكی سەرەكی تەرخاندەكات.

٥ـ كاركردن بۆ گەڕاندنەوەی هێزی ئەمنی تایبەت بە پارێزگاكە.

٦ـ دەستپێكردن بە تەواوكردنی پرۆژەی ئاوی پارێزگاكە و چارەسەركردنی كێشەكانی.

٧ـ وەزارەتی پیشەسازی و كانزا پلانێك ئامادە دەكات بۆ بەگەڕخستنەوەی كارگە لەكاركەوتووەكان.

٨ـ دابینكردنی پارە بۆ پرۆژەی ئاو و ئاوەڕۆی شاری ناسرییە.

٩ـ دۆزینەوەی چارەسەری بەپەلە بۆ كێشەكانی دوو لە نەخۆشخانەكانی پارێزگاكە و دابینكردنی پارە و دەرمان بۆ فەرمانگە تەندروستییەكانی سنوورەكە.

١٠ـ پارێزگای زیقار شانەی قەیران دروستدەكات بۆ پەیوەندی و هەماهەنگی لەگەڵ ژووری پرۆسەكانی شانەی قەیرانی خزمەتگوزاری و ئەمنی، كە حەیدەر عەبادی سەرۆكایەتی دەكات.

١١ـ تاوتوێكردنی دواخستنی قەرزی سەر جوتیارانی پارێزگاكە بۆ ماوەی دوو ساڵ.

١٢ـ چارەسەركردنی كێشەكانی پرۆژەی یاریگای ئۆڵۆمپی لە شاری ناسرییە.

١٣ـ جێگیركردنی بەشی پارێزگاكە لە ئاوی دیجلە و فورات.

١٤ـ دابینكردنی پارە بۆ ئەو پرۆژانەی لە دروستكردنی بینای قوتابخانەكان قۆناغی باشیان بڕیوە.


ك.ك