هەنجیری خاڵۆبازیانی، یەكێك لە باشترین جۆرەكانی هەنجیر لە عێراق

هەنجیری گوندی خاڵۆبازیانی سەربە پارێزگای كەركوك، بە یەكێك لە باشترین و بە تامترین هەنجیرەكانی عێراق دادەنرێت.


گوندی خاڵۆ بازیانی لە سنوری پارێزگای كەركوكە، پیشەی ساڵانەی دانیشتوانی ئەو گوندە كاری كشتوكاڵییە بە تایبەت میوەی هەنجیر، لەو گوندەوە ساڵانە هەنجیر هەناردەی هەرێم و عێراق دەكرێت.

لە شارەكانی هەرێمی كوردستان بە تایبەت لە سلێمانی و كەركوك لە وەرزی هاوین، هەنجیری خاڵۆبازیانی زۆرترین خواستی كڕیاری لەسەرە ئەوەش بە هۆی شیرینیی و زەردی ڕەنگەكەیەوە.

هێمن عەلی هاوڵاتی گوندی خاڵۆ بازیانی، بۆ ڕۆژنیوز وتی:" هەنجیری خاڵۆبازیانی بەهۆی تام و چێژەكەیەوە ناوبانگێكی باشی هەیە، هەروەها لە وەرزی پێگەیشتنی هەنجیر لە وەرزی هاویندا زۆرترین خواست لەسەر هەنجیری خاڵۆبازیانی هەیە، هەنجیری گوندەكەی ئێمە بۆ سەرجەم شارەكانی هەرێم و عێراق هەناردە دەكرێت".

هێمن ڕوونیشیكردووە:" ئەوەی هەنجیری خاڵۆبازیانی لە هەنجیری ئاسایی جیادەكاتەوە گەورەیی قەبارەی هەنجیرەكەیە، هەروەها شیرینی و زەردییەكی تۆخی هەنجیركەیە، بە پیتی خاكی گوندەكەش هۆكارە بۆ باشی بەرهەمی هەنجیری خاڵۆبازیانی، ساڵانە زۆرترین ڕێژەی فرۆشتنی هەنجیر لەم گوندە تۆمار دەكرێت".

حەسەن عەلی، هاوڵاتیەكی خاوەن باخی هەنجیر لە هەمان گوند، بۆ ڕۆژنیوز دەدوێت و دەڵێت:" من لە تەمەنی حەوت ساڵیەوە خەریكی كاری باخداریم بە تایبەت كاری هەنجیر، باو و باپیرانمان خەریكی كاری هەنجیر و باخداری بوونە، ئەگەر هەر باخێك هەنجیری نەبێت ئەوا بە باخ هەژمار ناكرێت".

دەشڵێت:" هەنجیری گوندەكە هەناردەی زۆربەی شارەكانی عێراق دەكرێت، هەروەها سلێمانی و كەركوكیش، بەرهەمی بەدەستهاتووی هەنجیر لێرە لە ئاستێكی باشدایە".


ك.ك/س