محەمەد هاودیانی: له‌سەدا ١٨ ى منداڵانى عێراق کار ده‌که‌ن


ڕۆژنیوز - قه‌ره‌چوغ ئه‌نوه‌ر

وەزارەت کار و کاروباری حکومەتی هەرێمی کوردستان بە هاوکاریی یونسێڤ و کۆمەڵەی هیوا کار بۆ داڕشتنی ڕەشنووسی سیاسه‌تی پاراستنی منداڵانی هەرێم دەکات، بەپێی ئامارێک-یش ١٨%ی منداڵانی عێراق کاردەکەن.

ئەمڕۆ کاتژمێر ١٠:٠٠ لە هۆڵی هۆتیل دیدەمان لە شاری هەولێر وۆرکشۆپێک بۆ پاراستنی منداڵان-ی هەرێمی کوردستان دەستپێکرد و بڕیارە سێ ڕۆژ بەردەوامبێت.

پێش دەستپێکردنی وۆرکشۆپەکە، محەمەد هاودیانی، وەزیری کار و کاروباری کۆمەڵایەتی حکومەتی هەرێمی کوردستان لە کۆنگرەیەکی ڕۆژنامەنووسیدا زانیاریی لەسەر وۆرکشۆپەکە ڕاگەیاند و وتی: به‌ هاوکاریى ڕێکخراوى یونسێف و کۆمه‌ڵه‌ى هیواى عێراقى ئه‌م وۆرکشۆپه‌مان ڕێکخستووه‌، شارەزایانی ناوخۆ و بیانی تیایدا ئامادە دەبن.

هاودیانی، وتیشی: ئه‌م وۆرکشۆپه‌ که‌ماوه‌ى سێ رۆژ ده‌خایه‌نێت مه‌به‌ست لێى ئاماده‌کردنی ڕه‌شنوسی سیاسه‌تی پاراستنی منداڵە له‌ هه‌رێمی کوردستان.

ناوبراو، وتیشی: ده‌مانه‌وێت سیاسه‌تێک دابڕێژین، که‌ به‌شێوه‌ى ستاندارى نێوده‌وڵه‌تى منداڵان بپارێزین و دواتر پرۆژه‌که‌ ده‌به‌ینه‌ ئه‌نجومه‌نى وه‌زیران و پاش په‌سندکردنى جێبه‌جێ بکه‌ین.

وەزیری کار و کاروبارى کۆمه‌ڵایه‌تى، ئاماژەی بۆ ئەوەشکرد، کە وەزارەتەکەیان کۆمه‌ڵێک ڕێکارى گرتووەته‌ به‌ر بۆ پاراستنى مافه‌کانى منداڵان، وه‌ک کردنه‌وه‌ى هێڵى گه‌رم که‌ ڕۆژانه‌ منداڵان بۆ خستەنەڕووی کێشەکانیان و بەدەمەوەچوونیان پەیوەندییان پێوەدەکەن، هەروەها پرۆژه‌ى خێزانى جێگره‌وه‌یان ڕاگه‌یاندووه‌ بۆ ئه‌وه‌ى منداڵانى بێ دایک و باوک لەخۆ بگرن و بپارێزین و له‌ئێستاشدا پرۆژەکە جیبەجێ کراوە.

سه‌باره‌ت به‌ کارکردنى منداڵانیش له‌هه‌رێمى کوردستان، هاودیانی، هیچ ئامارێکی لەبەردەستدا نەبوو، وتی: منداڵ له‌هه‌رێمى کوردستان کارده‌که‌ن، به‌ڵام به‌و ڕێژه‌ زۆره‌ نیه‌ باس ده‌کرێت، بۆیه‌ له‌گه‌ڵ یونسێف و رێکخراوى کارى نێوده‌وڵه‌تى کارمان له‌سه‌رى کردووه،‌ که‌ ئامارێک هه‌بێت له‌به‌رده‌ستمان تاکو بزاندرێت ڕێژه‌ى منداڵانى کارکه‌ر چه‌ندە‌.

هەروەها، وتی: کارکردن به‌منداڵان تاوانه‌ و له ‌داهاتووش پرۆژه‌مان ده‌بێت بۆ کارنه‌کردن به‌منداڵان.

جێگای ئاماژەیە، بەپێی ئامارێکی ڕێکخراوی یونسێڤ و کۆمەڵی هیوای عێراقی، کە لە وۆرکسۆپەکەدا دەیخەنەڕوو، له‌سه‌ر ئاستى عێراق له‌ ٨٤% ى خوێندکاران ڕووبه‌ڕووى توندوتیژى جه‌سته‌یى و ده‌روونى ده‌بنه‌وه‌ و له‌ ١٨%ى منداڵان له‌عێراق کار ده‌که‌ن و شەش هه‌زار منداڵیش له‌ململانێدان له‌گه‌ڵ یاسادا (لە گرتوخانەکاندان)، هەروەها له‌ ٥%ى منداڵان له‌خانه‌کانى بێ سه‌رپه‌رشتاندان.

ش.ف