هونەری حەسەن زیرەک لەنێوان کۆن و نوێدا

ڕۆژنیوز-کەرکوک

سەرباری پێشکەوتنەکان و هاتنەکایەی ئامێری ژەنین و دەنگی نوێ، بەڵام هێشتا بەشێک لە هاوڵاتیان و گوێرانى گۆرانی لەتەمەنە جیاوازەکاندا گوێ لە هونەری کۆن دەگرن و چێژی لێ وەردەگرن، پێشیانوایە کە هونەری کۆن نەمرە، چونکە هونەرمەند بە هەموو هەست و توانای خۆیەوە گۆرانییەکەى چڕیوە.

ئەمە یادێکە بۆ هونەرمەندی کۆچکروو حەسەن زیرەک سازکراوە، لێرە هەموو تەمەنە جیاوازەکان بە پیاو و ژنەوە ئامادەییان هەیە، ئەوان زیاتر هونەری کۆن پەسەند دەکەن، سدیق شەیدا کە چەند گۆرانیەکی لە بۆنەکەدا وتەوە بە ڕۆژنیوزی وت : سەردەمی حەسەن زیرەک سەردەمێکی تایبەتی بوو، بەبەراورد لەگەڵ ئەو کاتەدا جیاوازیەکی زۆر هەیە، ئێستە ڕاستە هونەر لە پێشکەوتندایە بەهۆی ئینەرنێت و ئامێری نوێوە،  بەڵام ئەو گۆرانیانە ڕەسەنن و هەرگیز کۆن نابن، چونکە گەر ئێستا گوێ لە گۆرانییەکی حەسەن زیرەک بگریت وا دەزانی ئەمڕۆ وتراوە، بەڵام گۆرانی ئەمڕۆ هەر ماوەی هەفتەیەک بۆ دە ڕۆژ و لەبیر دەچنەوە .

ژنانیش شەیدای گۆرانی کۆن بوون، بەتایبەتی حەسەن زیرەک ، ئەلفیە ئیبراهیم کە حەزێکی زۆری بۆ دەنگی حەسەن زیرەک هەیە وتی: من هەمیشە گوێ لە دەنگی زیرەک دەگرم هیچکات گۆرانیەکانی زیرەک ، نە لێی بێزارت دەبم و نە مێشکم لەئاوازەکانی تێر دەبێت، چونکە هونەری حەسەن زیرەک قوتابخانەیەکە کە هیچ کاتێک نە کۆتایی دێت و نەگۆرانیەکانی پیر دەبن.

ئەو پێشیوایە کە چەندین نەوەی دوای ئێمەش هەر وەکو ئێمە سەرسامی زیرەک دەبن، دەشڵێت، بێگومان هەموومان گوێ لە گۆرانی نوێش دەگرین، بەڵام گۆرانیە تازەکان دوای ماوەیەکی کەم لێی بێزار دەبین، بەڵام کە هەرجارێک گوێ لە بیرەک دەگری وشەیەکی تازە دێتە بەرگوێت و هەرجارێک بە شێوازێکی خۆشتر دەچێتە گوێمانەوە .

ژەنیارەکانی ئامێرە میوزیکیەکانیش کە هەمیشە لەگەڵ ئامێرەکەیاندا ئاوازەکان چێژبەخشتر دەکەن و ڕۆح دەکەن بەبەری تێکستدا ودەیکەن بەگۆرانی، ژەنینی ئاوازی کۆنیانی لا بەچێژترە.

 حەمید ژەنیار کە میوزیکی بۆ زۆرێک لە هونەرمەندان ژەنیوە دەڵێت: ئەو کاتەی کە من هونەری ئەو مامۆستا گەورانەی وەکو حەسەن زیرەک، عەلی مەردان،مەزهەری خالقی و ماملێ میوزیک دەژەنم یان میوزیکی ئەوان دەژەنم، هەست بە ڕوحیەتێکی جوان، بەتام و چێژی هونەر دەکەم، خۆشم ئەو هەستەم بۆ ئەوان زۆرترە بەبەراورد بە ژەنین بۆ ئەو هونەرمەندانەی ئێستا هەن و زیاتر چێژ لە کۆنەکان دەبینم، من پێم وایە لەبەر ئەوەیە کە ئەوکاتە بەڕاستی بۆ هونەر کار دەکرا، ئێستا بەهۆی تێکەڵاو بوونمان بە هونەری گەلانی تر و سوشیاڵ میدیا کە چەندە سودمان لێ وەرگرتووە ئەوەندەش زیانمان بەرکەوتووە ، لەبەر ئەوەی تام و چێژی ڕەسەنایەتیمان لەدەست داوە .

هاوکات دکتۆر مەولود ئیبراهیم لەو بارەیەوە بە ڕۆژنیوزی وت : ئەوەی کە بەتەمەنەکان گوێ لە گۆرانی ئێستا ناگرن شتێکی ئاساییە، چونکە یادگارییان لەگەڵ ئەو گۆرانیانە نیە، ئەم گۆرانیانەی ئێستا زۆرییان گۆرانی وەرزین و سەرهەڵدەدەن و دەڕۆن واتا تەمەنیان درێژ نیە  زۆریش لەگەڵ میزاجی ئەو تەمەنە ناگونجێت .

ئاماژە بەوەش دەکات، ئەوەی گوێ لە هونەرمەندە کۆنەکان دەگرێت هۆی ئەوەیە لەگەڵی ژیاون وە ئەو هونەرمەندانە لەناو ڕەحمی کلتورەوە لەدایک بوونە، بەدەنگێکی خۆش و بە گوتنێکی چاک و بەهونەرمەندییەکی گەورە کە هەموو مەرجەکانی هونەرمەند بوونیان تێدا هەیە، کە دەگونجێت لەگەڵ زەوقی ئەو تەمەنەی ڕابردوو، چونکە دونیای زیرەک و ماملێ دونیای کوردەوارییە، گەنجی ئێستا لەوە دوورە ، لەناو شارەکان ژیاون کە لەگەڵ ئەوانەدا تێکەڵ نابن.

ه.ح

 

Comments are closed.