مەبەست لە سیستمی بەرگری جەستە (مەناعە) چیە؟

ڕۆژنیوز- ناوەندى هەواڵەکان

دکتۆر بڕیار سەباح دەڵێت، کەمبوونەوەی بەرگری جەستە ئەبێتە هۆکارێک بۆ تووش بوون بە جۆرە جیاوازەکانی هەوکردن وەک هەوکردنی بەکتریایی و ڤایرۆسی و کەڕوویی، دەشڵێت، زیادبوونی تەمەن بە تایبەت لەدوای تەمەنی ٦٥ ساڵیەوە یەکێکە لە هۆکارەکانى کەمبونەوەى بەرگرى جەستە.

دکتۆر بڕیار سەباح، پسپۆڕی نەخۆشییەکانی خوێن، لە نوسینێکدا ئاماژە بە سیستمی بەرگری جەستە (مەناعە) و هۆکارەکانى کەمبونەوە بەرگرى لە جەستە دەکات و دەقەکەى بەمجۆرەیە:-

کەمبوونەوەی بەرگری جەستە ئەبێتە هۆکارێک بۆ تووش بوون بە جۆرە جیاوازەکانی هەوکردن وەک هەوکردنی بەکتریایی و ڤایرۆسی و کەڕوویی یان هەندێک جار تێکچوونی بەرگری جەستە ئەبێتە هۆی تووش بوون بە هەندێک جۆری شێرپەنجە یان هەندێک نەخۆشی دیکە.

مەبەستم لەکەمبوونەوەی بەرگری جەستە چیە؟

بە دوو شێواز ڕوودەدات :-

١- کەمبوونەوەی ژمارەی خانەکانی کۆئەندامی بەرگری جەستە.

٢- تێکچوونی کارکردنی خانەکانی بەرگری جەستە.

هۆکارەکانى کەمبونەوەى بەرگرى لە جەستە چین ؟

١- هۆکاری جینی -هەندێک نەخۆشی جینی هەیە، کە هەر لە دایکبوونەوە کەسەکە بەرگری لەشی کەمە و زوو زوو تووشی هەوکردن دەبێت.

٢- هەندێک نەخۆشی هەوکردن یان درێژخایەن وەک – نەخۆشی شەکرە و نەخۆشی ئایدز.

٣- هەندێک جۆری دەرمان وەک – ستیرۆیدەکان و چارەسەری کیمیاوی و هەندێک چارەسەری تر کە بەرگری جەستە دادەبەزێنن.

٤- هەندێک هۆکاری ژینگەیی وەک هەندێک ماددەی کیمیاوی.

٥- زیادبوونی تەمەن بە تایبەت لەدوای تەمەنی ٦٥ ساڵیەوە یەکێکی ترە لە هۆکارەکان.

٦- لە منداڵیشدا هۆکارەکە ئەوەیە هێشتا کۆئەندامی بەرگری جەستە بە تەواوی گەشەی نەکردوە لەگەڵ هەندێک هۆکاری دیکە.

٧-کەمی خواردنی هەندێک خۆراک، کە ئەمەش دەبێتە هۆی کەمی هەندێک ڤیتامین لە جەستەدا.

٨- نەبوونی جووڵە و وەرزش کردن لە ژیانی ڕۆژانەدا و هەروەها خەوی ناڕێک و کەم وە هەروەها بوونی سترێسێکی زۆری ڕۆژانە – هەندێک لە توێژینەوەکان باس لەم هۆکارانەش دەکەن بۆ کەمی بەرگری جەستە.

ئ.م