نۆ ساڵە حکومەت بینای شارەوانی کفری پێتەواو نەکراوە

گەرمیان

بەهۆی تەواونەبوونی بیناکەیانەوە، شارەوانی شارۆچکەی کفری لەناو بینای دایەنگەیەکدا، نۆ ساڵە لەناو دایەنگەیەکدا کارەکانی بەڕێدەکات کە تائێستا حکومەتى هەرێم تەواوی نەکردوە، بەڕێوەبەری شارەوانیش دەڵێت: بەهۆی قەیرانی داراییەوە تاوەکو ئێستا ئاوارەین.

لەبەر کۆنی بینای شارەوانی لەشارۆچکەی کفری سەربەئیدارەی گەرمیان، بڕیاردرا بینایەکی نوێیان بۆ دروستبکرێت، بەڵام لە ساڵی ٢٠١٤ەوە، تاوەکو ئێستا تەواو نەبووە و شارەوانی لەناو بینای دایەنگەیەکی سەربە کاروباری کۆمەڵایەتی کارەکانی بەڕێدەکات.

پڕۆژەی نوێکردنەوەی بینای شارەوانی کفری لەگەڵ فەرمانگەی ئاوی کفری، لەساڵی ٢٠١٣ بە گوژمەی یەک ملیۆن و ٤٠٠ هەزار دۆلار، لەگەڕەکی ئیمام محەمەد لەلایەن کۆمپانیای خاکی عەفرینەوە دەست بەدروستکردنی کرا، بەڵام کارکردنی تێیدا زۆری نەخایاند و لەساڵی ٢٠١٤ەوە تاوەکو ئێستا وەستاوە.

لەبارەى وەستانى ئەو پڕۆژەیەوە، عەلی خورشید، سەرۆکی شارەوانیی کفری، لەبارەی هۆکاری تەواونەبوونی بیناکە بۆ ڕۆژنیوز وتی: بیناکە ٥٠%ی تەواوبووە، بەڵام بەهۆی قەیرانی داراییەوە تاوەکو ئێستا تەواو نەبووە و کارکردن بەتەواوی تێیدا وەستاوە.

ئاماژەی بەوەشکرد، ئێستا ئاوارەی بینای دایەنگەیەکی سەربە بەڕێوەبەرایەتی کاروباری کۆمەڵایەتیین، کارەکانی ڕۆژانەیان لەناو ئەوبینایەدا بەڕێدەکەن.

هـ.ح