ئەمیندارى گشتى ناتۆ: ڕێز لە سەروەری عێراق دەگرین

ناوەندی هەواڵەكان

ئەمینداری گشتیی ناتۆ، لە بارەگای ناتۆ لە بەلجیكا لەگەڵ وەزیری دەرەوەی عێراق كۆبوەوە و لە كۆبونەوەكەدا هەوڵەكانی عێراق لەبارەى بەرەنگاربوونەوەی تیرۆر و بەرەوپێشبردنی سەقامگیری بەرز نرخێندرا و هەروەها، ئەمیندارى ناتۆ ڕایگەیاند، ناتۆ ڕێز لەسەروەری و یەكپارچەیی عێراق دەگرێت.

ناتۆ لە ڕاگەیەندراوێکدا بڵاویكردەوە، لە پەراوێزی بەڕێوەچوونى خولی سێیەمی ئەنجوومەنی هاریكاری عێراق و ئەوروپا لە برۆكسل جێنس ستۆڵتنبێرگ، ئەمینداری گشتیی ناتۆ لە برۆكسلی پایتەختی بەلجیكا لەگەڵ فوئاد حسێن، وەزیری دەرەوەی عێراق کۆبوەوە .

ئاماژە بەوەشكراوە، ئەمینداری ناتۆ هەوڵەكانی عێراقی لە بەرەنگاربوونەوەی تیرۆر و بەرەوپێشبردنی سەقامگیری بەرز نرخاند و سوپاس و پێزانینی خۆی بۆ عێراق دەربڕی بۆ پابەندبوونی بە بەهێزكردنی هاوبەشی لەگەڵ هاوپەیمانییەكە، بەتایبەتی سەبارەت بە بەرەنگاربوونەوەی تیرۆری نێودەوڵەتی و بەرەوپێشبردنی سەقامگیری لە ناوچەكەدا.

ئەوەشخراوەتەڕوو، لە كۆبونەوەكەدا بیروڕا ئاڵوگۆڕ كراوە، سەبارەت بە چۆنیەتی پتەوكردنی کارى هاوبەشی نێوان هەردوولا، ئەمیندارى ناتۆ ڕایگەیاند، ناتۆ ڕێز لەسەروەری و یەكپارچەیی عێراق دەگرێت.

جێگەى ئاماژەیە، فوئاد حسێن، وەزیری دەرەوەی عێراق لە سەرەتای ئەم هەفتەوە بە سەرۆكایەتی شاندێكی باڵا سەردانی برۆكسلی پایتەختی بەلجیكای بەمەبەستی بەشداریكردن لە كۆبونەوەی ناتۆ کردووە.

ه.ئ