بایدن جارێکی دیکە ئەردۆغانی بانگهێشتی ‘لوتکەی دیموکراسی’ نەکرد

لە کاتێکدا بایدن سەرۆکی ئەمریکا هەشت وڵاتی بانگهێشت نەکراوی پێشتری بۆ ‘لووتکەی دیموکراسی’ بانگهێشتکردەوە بەڵام ئەنجارەش ئەردۆغان و دەوڵەتی تورک بانگهێشت نەکرایەوە.

جۆ بایدن، سەرۆکی ئەمریکا بۆ ‘لوتکەی دیموکراسی’، کە دوای دوو ساڵ جارێکی دیکە بەڕێوەدەچێت، تورکیا و هەنگاریای بانگهێشت نەکرد بەڵام هەشت وڵات کە لە لوتکەی پێشترا بانگهێشتنەکرابون بۆ ئەمجارە بانگهێشت کراونەتەوە.

گۆڤاری فۆرین پۆلیسی، لە زاری سێ بەرپرسی ئەمریکی پشتڕاستی کردەوە کە تورکیا و هەنگاریا کە هاوکات ئەندامی ناتۆن، بانگهێشتی ‘لوتکەی دیموکراسی’نەکراون.

لە ڕاپۆرتی گۆڤارەکەدا ئاماژە بە ڕۆڵی خراپی ئەردۆغان لە دژایەتی دیموکراسیدا کراوە و دەڵێت، ئەردۆغان دەسەڵاتی لای خۆی کۆکردەوە و گروپە دیموکراسیەکانی وڵاتەکەی تەسفیە کرد.

بەرپرسێکی ئیدارەی بایدن لە ڕاپۆرتەکەیدا وتویەتی، ئامانجی لوتکەکە “خستنەڕووی بۆچوونێک نییە لەسەر ئەوەی کە دیموکراسی وڵاتێکی دیکە چەندە بەهێزە”.

وتیشی: ئێمە پابەندین بە پتەوکردنی زیاتری پەیوەندییەکانمان لەگەڵ تورکیا و هەنگاریا، هەردووکیان هاوپەیمانی گرنگی ناتۆن؛ ئێمە پێکەوە کاردەکەین لەسەر زۆر بابەت و بەرژەوەندی هاوبەش.

لوتکەی دیموکراسی کە لە ٢٨-٣٠ی ئازار بەڕێوەدەچێت، ئەمریکا، کۆستاریکا، کۆری باشوور، هۆڵەندا و زامبیا بە هاوبەشی میوانداری دەکەن و وڵاتانی هندۆراس، کەناری عاج، گامبیا، مۆریتانیا، مۆزەمبیق، تانزانیا، بۆسنە و هەرزەگۆڤینا و لیختنشتاین کە لە ساڵی ٢٠٢١دا بانگهێشت نەکرابوون، ئەمساڵ بەشداری لە لوتکەکەدا دەکەن، کە نزیکەی ١٢٠ وڵات بانگهێشتی لوتکەکە دەکرێن.

یەکەمین لوتکەی دیموکراسی، کە کۆبوونەوەی ڕووبەڕوو و ئۆنلاین لەسەر بابەتەکانی وەک ‘بەرگریکردن لە دیموکراسی و مافی مرۆڤ لە دژی پاوانخوازی، ڕۆڵی ژنان لە دیموکراسی و بەرەنگاربوونەوەی گەندەڵی’ بەڕێوەچوو، لە ساڵی ٢٠٢١ بەڕێوەچوو. ئیدارەی بایدنیش تورکیا و هەنگاریای بۆ ئەم لوتکەیە بانگهێشت نەکرد.

ها-ع