ناوەندی هەواڵەکان
وەزارەتی سامانە سرووشتییەکانی هەرێمی کوردستان رایگەیاند، بڕیارەکەی دادگای پاریس لە بەرژەوەندیی حکومەتی عێراق دژی تورکیا، رێگر نابێت لە پەیوەندییەکانیان لەگەڵ حکومەتی بەغدا و دەشڵێت، بەردەوام دەبن لە پەیوەندییەکانیان لەگەڵ بەغدا.
دوای ئەوەی دادگای پاریس لەبارەی سکاڵاکەی عێراق لە دژی تورکیا بریاریدا، وەزارەتی سامانە سرووشتییەکانی هەرێمی کوردستان لەبارەی راگرتنی هەناردەکردنی نەوتی هەرێمی کوردستان و کەرکوک لە رێگەی بۆرییەوە بۆ تورکیا ڕایگەیاند: بڕیاری دادگای فەرەنسی لە بەرژەوەندیی حکومەتی عێراق دژی تورکیا، رێگر نابێت لە پەیوەندییەکانمان لەگەڵ حکومەتی بەغدا، لەم چوارچێوەیەدا، سەردانی بەغدا دەکەینەوە بۆ گفتوگۆ و چارەسەرکردنی بابەتەکانی پەیوەندیدار.
وەزارەتەکە باس لەوەش دەکات: حکومەتی هەرێمی کوردستان لە چەند مانگی رابردوودا لە گفتوگۆ و دانوستانی بەردەوامدا بووە لەگەڵ حکومەتی عێراق و دواجار لە سەر پرسی بودجە و نەوت و گاز، هەردوولا گەیشتوونەتە رێککەوتنی سەرەتایی و لەیەکتێگەیشتنی باش کە لە چوارچێوەی دەستووردا، ماف و شایستە دەستوورییەکانی هەرێمی کوردستان دابین دەکرێن.
وەزارەتی سامانە سرووشتییەکان راشیگەیاندووە: حکومەتی هەرێمی کوردستان وێڕای دووپاتکردنەوەی هەڵوێستی نەگۆڕی خۆی لە دەستبەردارنەبوون لە مافە دەستوورییەکانی گەلی کوردستان، بەردەوام دەبێت لە پەیوەندییەکانی لەگەڵ بەغدا تا گەیشتن بە چارەسەری بنەڕەتی و یاسایی و دەستووری.
ها-ع
Comments are closed.