دوای بڕیارەکەى دادگای فیدراڵی فوئاد حسێن لەگەڵ سەرۆکی دادگاکە کۆدەبێتەوە

ناوەندی هەواڵەکان

سەرۆکی دادگای فیدڕاڵی و وەزیری دەرەوەی عێراق کۆبوونەوە و ڕایدەگەیەنن، پێویستە بنەماکانی دیموکراسی گەشەی زیاتریان پێبدرێت و گەرەنتی سەروەری یاسا و ئاڵوگۆڕی ئاشتیانەی دەسەڵات بکرێت.

ئەمڕۆ دادگای فیدڕاڵی عێراق لە ڕاگەیەنراوێکدا بڵاویکردەوە، دادوەر جاسم محەمەد عبود سەرۆکی دادگای فیدڕاڵی پێشواز لە فوئاد حسێن وەزیری دەرەوە کردووە و ھەردوولا باسیان لە گەشەپێدانی پەیوەندییەکانی دادگای فیدڕاڵی کردووە لەگەڵ دادگا دەستورییەکانی دیکەی جیھان.

ئاماژە بۆ ئەوەشکراوە، ئامانج لەو ھەنگاوە بۆ پاراستنی ئازادی و مافە سیاسی و مەدەنییەکانە، تاوەکو ھاووڵاتیان بتوانن بە ئازادی پیادەی مافە سیاسی و مەدەنییەکانیان بکەن.

دادگای فیدڕاڵی عێراق ئەوەى خستەڕوو، لە کۆبوونەوەکەدا جەختکراوەتە لەسەر گەرەنتیکردنی مافی دەنگدان، ھەڵبژاردن و خۆکاندیدکردن کە دەبێتە بنەمایەک بۆ سەروەری یاسا و ئاڵوگۆڕی ئاشتیانەی دەسەڵات.

ڕۆژی سێشەممەی ڕابردوو دادگای فیدڕاڵی بڕیاری درێژکردنەوەی تەمەنی پەرلەمانی کوردستانی ھەڵوەشاندەوە،  لەئێستاشدا سێ سکاڵای دیکە لە دادگاکە تۆمارکراون کە ھەرسێکیان پەیوەستن بە ھەرێمی کوردستانەوە.

ه.ح