سزای زیندانی هەتاهەتایی بۆ بکوژەکەی شنیار هونەر دەرچوو

پارێزەری دۆسییەی شنیار هونەر،  کە مانگی شووباتی ساڵی پار هاوسەرەکەی سووتاندی، ڕایگەیاند، ئەمڕۆ دادگا بڕیاری کۆتایی لەبارەی دۆسییەکەوە دەرکردوو و تاوانبارەکە، کە هاوسەری شنیار بوو، سزای ٢٠ ساڵ زیندانیی کردنی بۆ دەرچوو.

ئاودێر عومه‌ر، پارێزەری دۆسییەی شنیار هونەر، لە بەردەم دادگای سلێمانیدا و لە کۆنگرەیەکی ڕۆژنامەنوسییدا ڕایگەیاند،  ئەمڕۆ دادگای تاوانەكانی سلێمانی سزای زیندانییكردنی تاهەتایی بەسەر هاوسەری شنیار هونەردا سه‌پاند.

شنیار هونەر، ژنێکی گەنجی خەڵکی سلێمانی بوو، مانگی شووباتی ساڵی ٢٠٢٢، لەلایەن هاوسەرەکەیەوە سوتێنرا و پاش مانەوەی بۆ چەند ڕۆژێک لە نەخۆشخانە، گیانی لەدەستدا.

دوای دەستگیرکردنی هاوسەرەکەی، ژنێکی دیکەش بەتۆمەتی هەبوونی پەیوەندی لەگەڵ پیاوەکە و هاندانی بۆ کوشتنی شنیار، دەستگیرکرا، بەڵام وەک پارێزەر ئاودێر عومەر وتی، ژنەکە ئازاد کرا و سزای بەندکردنی هەتاهەتایی بۆ هاوسەرەکەی شنیار هونەر دەرچووە.

پارێزەرەکە وتیشی: بەڵام ئێمە بە بڕیارەکە ڕازینابین و تانەی لێ دەدەین، چونکە دەبوو سزاکە توندتر بێت، بەپێی یاسا سوتاندن دەچێتە چوارچێوەی کوشتن بەشێوەیەکی “وەحشیانە” و سزاکەی دەبێت لەسێدارەدان بێت.

ش. ئـ