لە سلێمانی فێستیڤاڵى هەفتەی کتێب ماوەى سێ ڕۆژە بەردەوامە

سلێمانى

لە شاری سلێمانی، فێستیڤاڵی هەفتە چالاکیی کتێب کرایەوە و تێیدا نزیکەی ١٠ هەزار ناونیشان لەخۆ دەگرێت و بڕیارە چالاکییەکە تا ڕۆژی پێنجشەمە بەردەوام دەبێت.

ماوەی سێ ڕۆژە، لە کتێبخانەی گشتیی شاری سلێمانی، بە چاودێری وەزیری ڕۆشنبیریی و لاوان لەگەڵ کتێبخانەی گشتیی سلێمانی، فێستیڤاڵی هەفتە چالاکی کتێبخانە، ماوەی سێ ڕۆژە کراوەتەوە.

فێستیڤاڵەکە پێکدێت لە چەندین چالاکی جۆراوجۆری هونەریی، پێشانگای شێوەکاریی و فۆتۆگرافیی و کاری دەستی، پێشکەشکردنی فیلم، سیمینار و چەندین کۆڕی شیعریی.

لە بارەی فێستیڤاڵەکەوە، شاهۆ عوسمان، ئەندامی لیژنەی باڵای فێستیڤاڵەکە بە ڕۆژنیوزی وت: فێستیڤاڵەکە لە ڕۆژی شەمەوە کراوەتەوە و کۆمەڵێک چالاکی جیاوازی هونەریی، پێشانگای کاری دەستی و شێوەکاری و کۆڕی شیعری لەخۆ دەگرێت، تا ڕۆژی پێنجشەمەش بەردەوام دەبێت.

شاهۆ عوسمان باسى لەوەشکرد، لە فێستیڤاڵەکەدا ١٦ ناوەندی چاپ و بڵاوکردنەوە لە شاری سلێمانی بەشدار بوون و نزیکەی ١٠ هەزار ناونیشان لە خۆ دەگرێت.

سەبارەت بە بەشداریی هاوڵاتییان لە فێستیڤاڵەکەدا، ئەوەى خستە ڕوو، بەراورد بە وەرزی پشووی هاوین، بەداخەوە ڕێژەیەکی کەم لە هاوڵاتییان بەشدارییان کردووە.

ئـ.م