بەرپرسێكی یەنەكە: پارتی پلان و بەرنامەی توركیا لە كەركووك جێبەجێ دەكات

کۆیە

جێگری بەرپرسی مەڵبەندی یەنەکە لە شارۆچکەی کۆیە، سیناریۆکانى پشتى گرژی و ئاڵۆزییەکانى ئەم دواییەى کەرکووکی خستە ڕوو دەڵێت: میتى تورکیی بە هاوکاری پارتى دەیانەوێت دۆخى کەرکووک ئاڵۆز بکەن و تێکی بدەن، دەشڵێت: پەكەكە ئەو هێزەیە هەر چوار بەشی كوردستان هەستی نەتەوایەتی تاكی كوردی بەرز كردووەتەوە.

ئاسۆ كاكە ڕەش جێگری بەرپرسی مەڵبەندی یەنەكە لە شارۆچکەی كۆیە لەم چاوپێکەوتنەى ئاژانسی ڕۆژنیوزدا تیشک دەخاتە سەر دۆخی کەرکووک و ئەو کێشانەى لە شارەکەدا ڕوو دەدەن و دەڵێت: توركیا دەستی لە هەموو ئەو شتانەدا هەیە كە بەسەر كەركووك و خەڵکی شارەکەدا دێت، هەر بۆیە  ئێستا ئەوەی لە كەركووك ڕوودەدات میتی توركیایە بە هاوكاری پارتی درووستی دەكات.

ئاسۆ كاكە ڕەش سەرەتا بەمجۆرە دەستی بە هەڵسەنگاندنەکانى لەبارەى کەرکووکەوە کرد و وتى: ئەم كێشەی ئێستا لە ناو كەركووك هەیە لایەنێكی كوردیی بە تایبەتی پەدەكە لێی بەرپرسیارە، پارتی لەگەڵ كۆمەڵێك لیستی عەرەبی و توركمانی دادەبەزێت، بۆ راكێشانی شەقامی كەركوك كۆمەڵێك كێشە درووست دەكات، گوایە ڕێگە نادرێت پارتی بگەرێتەوە كەركووک، بەڵام پێم خۆشە هەموو لایەک ئەو ڕاستییە بزان كە ئەو هۆز و عەشایەرانەی خێمەیان هەڵدابوو، دۆستایەتی دێرینیان لەگەڵ مەلا مستەفا هەبووە و ئێستاش لەگەڵ مسعود بارزانی و پارتی هەیانە.

“پارتى خۆی نایەویت بگەڕێتەوە کەرکووک و سیناریۆ درووست دەکات”

ئاماژە بەوەش دەکات، بەشێكی زۆر لەوانەى دەیانووت نابێت پارتى بگەڕێتەوە کەرکووک و خێمەیان هەڵدابوو، لە ئێستادا لە شاری هەولێر دەژین و كاری بازرگانی ئەنجام ئەدەن، بۆیە دەڵێت: پێم سەیرە ئەو لایەنانە خێمەیان هەڵداوە و دەڵێن نابێت پارتی بگەڕێیتەوە كەركووك ئەوەی دیارە پارتی خۆی نایەوێت بگەڕێیتەوە كەركووك، چونكە هیچ نفوزێكی لەو شارە نییە، باوەڕیشم بەو سیناریۆیانە نییە كە هێزی تر بتوانن نفوز بۆ پارتی پەیدا بكەن، بۆیە ئەمە تەنیا خاڵێكی بانگەشەیە بۆ هەڵبژاردنی ئەنجومەنی پارێزگاكان.

“ئەوەی لە كەركووك ڕوودەدات میتە بە هاوكاری پارتی درووستى دەکات”

سەبارەت بە درووستنەبوونى یەک لیستى بۆ هەڵبژاردنەکان و نەبوونى یەکڕیزی لایەنە کوردییەکان، بەرپرسەکەى یەنەکە ڕایگەیاند: پارتی بەرپرسە لە تێكدانی یەكڕیزی كورد و یەك لیستی كوردی لەو شارە، ئاستەنگی زۆر درووست دەكات، توركیاش دەستی لە هەموو ئەو شتانە دا هەیە كە بەسەر كەركووك و كەركوكییەكاندا دێت، هەر بۆیە  ئێستا ئەوەی لە كەركووك ڕوودەدات میتی توركیایە بە هاوكاری پارتی دروستی دەكات.

بەرپرسەکەى یەنەکە لە کۆیە، لەبارەی هاوپەیمانی پارتی و عەرەبی سوننە و توركمانەكانەوە، ئەوە بەبیر دێنێتەوە کە لەساڵی ١٩٩٦ كاتێك دەبابەكانی ڕژێمی بەعس بەجهاوكاری پارتی هێرش دەكەنە سەر پەرلەمانی كوردستان، دواتر یەكێتی بە بەرنامە پاشەكشە دەكات بۆ سەر سنورەكان و وتیشی: ئەو كاتە لە كەناڵەكانی پارتی بانگەشەی ئەوە دەكرا دەیان وت، یەكێتی و پەكەكە هێرش دەكەنە سەر سیدەكان، بۆ ئەوەی زەمینە خۆش بكات بۆ هێنانی سوپای توركیا.

“پارتی پلان و بەرنامەی توركیا لە شاری كەركووك جێبەجێ دەكات”

هەر لە چاوپێکەوتنەکەدا ئاسۆ کاکە ڕەش ئەوەش ڕوون دەکاتەوە کە پارتی هێزێكە دژایەتی ڕۆژهەڵاتی كوردستان و باكوری كوردستان و ڕۆژئاوای كوردستان و باشووریش دەكات و ناشی شارێتەوە، چونکە پارتى لەگەڵ هەموو دوژمنێكی كوردە تەنها لەگەڵ كورد خۆی ڕێك نیە، پێشیوایە کە پارتی پلان و بەرنامەی توركیا لە شاری كەركووك جێبەجێ دەكات هەر شتێك پارتی بیكات توركیای لە پشتەوەیە.

” پارتی و توركیا هەوڵی شكاندنی یەكێتی دەدەن لە كەركووك”

هەر لەسەر دۆخی کەرکووک جێگری بەرپرسی مەڵبەندی یەنەکە لە شارۆچکەی کۆیە، وتیشی:  دەبێت كوردی كەركووك  یەكگرتوو  و تەبا بن، ئێمە وەكو یەكێتی پێمان وایە هەموو ئەوانەی دەكرێت بۆ ئەوەیە نفوزی یەكێتی لە كەركووك كەم بێتەوە، كە دڵنیا بن كەركووك بە یەكێتی نەبێت ناپارێزرێت، چونكە ئەگەر كەركووك لە دەست كورد و یەكێتی  بچێت، بە شۆڕش و خەباتی زۆر و ڕژانی ڕووبارێك خوێن دەتوانین تا وەكو ئێستای لێ دەكەینەوە.

بەرپرسەکەی یەنەکە پێشیوایە کە پارتی و توركیا هەوڵی شكاندنی یەكێتی دەدەن لە كەركووك، بۆیە شكانی یەكێتی واتا لەدەستدانی كەركووك.

لەسەر پرسی هێرشە داگیرکارییەکانى دەوڵەتیی تورکیش بۆ سەر خاکی کوردستان، ئاسۆ کاکەڕەش باسی لەوە کرد، ئەو كارانەی توركیا دەیانكات پێویستە بە گوێرەی یاسای نێودەوڵەتی مامەڵەی لەگەڵ بكرێت، بەهانەی توركیا هەبوونی پەكەكەیە لە  هەرێم، لە كاتێكدا پەکەکە بە گوێرەی ڕێكکەوتن و بە ئاگاداری عێراق و توركیا هاتۆتە قەندیل، چونكە پێشتر پارتی و یەكێتی و پەكەكە لەسەر ئەوە ڕێكەوتوون هێزەكانی پەكەكە بچنە قەندیل.

“تورکیا و پارتى هەوڵی داگیرکردنى کوردستان دەدەن”

هەروەها کاکەڕەش جەخت لەوە دەکاتەوە کە ئەو بەهانەیەی توركیا جگە لە شاردنەوەی مەرامە گڵاوەكانی هیچی تر نییە، چونكە ئەو  دەیەوێت سنووری دەوڵەتی عوسمانی بگەڕێنێتەوە، ڕوونیشی دەکاتەوە، خۆ پەكەكە لە لیبیا نییە لە هەندێك وڵاتی تر نیە كە هێرشیان بۆ دەكات، ئینجا ئەوەی توركیا ئەنجامی دەدات بە هاوكاری پارتییە ،چونكە ٩٠ بارەگای سەربازی و دەیان بارەگای میت لە سنووری پارتیدان، لەگەڵ پاراستنی پارتی هەوڵی داگیركردنی باشووری كوردستان دەدەن.

“فڕۆكەی بێ فڕۆكەوانی توركیا لە ژێر دەسەڵاتی پارتی هەڵدەفڕن”

جێگری بەرپرسی مەڵبەندی یەنەکە لە شارۆچکەی کۆیە ئەوەشی خستە ڕوو، كاتێك فرۆكەی بێ فرۆكەوانی توركیا بۆردوومانی ناوچەكانی ژێر دەسەڵاتی یەكێتی دەكات، ئەوە لە ژێر دەسەڵاتی پارتی هەڵدەفڕن، تاوەكو یەكێتی لە شەڕی پەكەكە تێوەبگلێنن كە هەرگیز یەكێتی ئەوەی قبوڵ نییە باجی هەڵوێستی نەتەوەی داوە و ئێستاش دەیدات.

لە درێژەی چاوپێکەوتنەکە بەرپرسەکەى یەنەکە ئاماژەى بە خیانەتەکانى پەدەکە کرد و باس لەوە دەکات کە پارتی بۆ مانەوەی خۆی پەنا بۆ هەموو شتێك دەبات و بردوویەتی، وەک خۆی باسی دەکات پەدەکە كێشەی بۆ هەموو شۆڕشەكانی بەشەكانی تری كوردستان درووست كردووە، هەر لە درووست بوونیەوە تا ئێستا هیچ هێزێكی كوردی نییە لە كوردستان كێشەی بۆ درووست نەكردبێت، لە كۆماری كوردستان لە مهابادەوە تا ئێستا بەردەوامە.

“سیاسەتی پارتی دژی نەتەوەی كوردە”

“چەندین ساڵە كورد هەوڵ دەدات كۆنگرەیەكی نەتەوەی لە هەولێر ببەسترێت پارتی رێگە نادات، لە یادی سەد ساڵە ڕێكکەوتنامەی لۆزان هەموو كورد لە شاری لۆزان كۆبوونەوە بۆ كورد ئامانج و ستراتیژیی خۆی هەبێت، تەنها هێزێك بەشداری نەكردبێت پارتی بووە، كەواتە نەتەوەی چی، سیاسەتی پارتی دژی نەتەوەی كوردە، چونكە دروشمێكیان دەڵێن گەر شۆڕشمان پێ نەكرێت پێمان تێك دەدرێت، ئێستاش كوردایەتیی و نەتەوایەتییان پێ ناكرێت هەوڵی تێكدانی یەكڕیزی كورد دەدەن” ئاسۆ کاکە ڕەش وایووت.

“ئێستا بەرخۆدانی گەریلا چووەتە ناخی هەموو كوردێكەوە”

لەبارەى خەبات و تێکۆشانى پەکەکە و کاریگەرییان لەسەر هەموو بەشەکانى کوردستان ئاسۆ کاکەڕەش دەڵێت: پەكەكە ئەو هێزەیە هەر چوار بەشی كوردستان هەستی نەتەوایەتی تاكی كوردی بەرز كردووەتەوە، چونكە بەرامبەر بە گەورەترین داگیركەر و هێزی ناتۆ خەبات دەكات، هەر بۆیە ئێستا بەرخۆدانی گەریلا چووەتە ناخی هەموو كوردێك.

هـ.ح

Comments are closed.