حەوت ژنە چالاکوانی سیاسیی لە زیندانی ئەوین خۆپیشاندانیان کرد

ناوەندی هەواڵەکان

حەوت ژنی زیندانی سیاسیی لە زیندانی ئەوین، بۆ پشتیوانیکردن لە ساڵڕۆژی شۆڕشی “ژن ژیان ئازادیی”ـدا لە حەوشەی زینداندا دەستیان بە خۆپیشاندان کردووە و ڕایانگەیاند، بەردەوام دەبین لە تێکۆشان تا ساتەوەختی سەرکەوتن.

بە بۆنەی ساڵیادی شەهیدبوونی ژینا ئەمینی و سەرهەڵدانی شۆڕشی “ژن، ژیان، ئازادیی” ، حەوت ژنە زیندانی سیاسیی، لە ١٤ـی ئەیلوولەوە لە حەوشەی زیندانەکەدا دەستیان بە خۆپیشاندان کردووە.

هەریەکە لە زیندانییان ئازادە عەبدینی، سپێدە قالیان، شاکیلا مونفەرەد، گۆلروخ ئیرای، نێرگس محەمەدی، مەحبوبە ڕەزایی و ڤیدا ڕەبانی، لە پەیامێکدا کە لەسەر هەژماری نێرگس محەمەدی، پارێزەری مافەکانی مرۆڤ بڵاو کراوەتەوە، هەڵوێستی خۆیان دەربڕی.

لەو پەیامەدا هاتووە:”ئێمە وەک ژنانی زیندانی سیاسیی لە زیندانی ئەوین لە ١٤ـی ئەیلوولەوە خۆپیشاندانێکمان لە حەوشەی زیندانەکەدا دەست پێکردووە، پشتیوانیی گەلەکەمان دەکەین و حکومەت شەرمەزار دەکەین.

ئەوەش هاتووە تێیدا: “ساڵێک بە سەر شەهیدبوونی ژینا ئەمینیدا تێدەپەڕێت، ڕق و کینەی ئێمە بەرامبەر بە شەهیدکردنی کوڕان و کچانی وڵاتەکەمان لە شەقامەکان و زیندانەکان و کوێرکردنی خۆپیشاندەران و دەستگیرکردن و ئەشکەنجەدان و زیندانیی کردنی ئەوانەی بەرگریی دەکەن دەبێتە برینێک لەسەر ڕۆحمان، ئێمە ئەو پاڵنەر و باوەڕەمان هەیە کە بەردەوام دەبین لە تێکۆشان تا ساتی سەرکەوتنمان.

لە کۆتاییشدا ئاماژەیان بەوە داوە: “وەک ژنانی زیندانی سیاسیی لە زیندانی ئەوین پشتیوانی لە گەلی ئێران دەکەین، کە بۆ ئازادیی و یەکسانیی تێدەکۆشن، ناڕەزایەتی لە دژی سیاسەتی توندوتیژیی و سەرکوتکەر و دڕندانەی ئایینی دەسەڵاتدار دەردەبڕین، لە ١٤ـی ئەیلوولەوە، هاوکات لەگەڵ گەلی کورد و ئێران لە حەوشەی زیندانی بەشی ژنانی ئەوین چالاکی ئەنجام دەدەین، داوا لە هەموو ڕای گشتی و گەلانی دیموکرات دەکەین، کە ببنە دەنگی گەل و خۆپیشاندەرانی ئێران.

ب. ق