ژنانی ڕۆژئاوای کوردستان بۆ ساڵیادی “ژن ژیان ئازادیی” لەسەر پێ بوون

ناوەندی هەواڵەکان

بە بۆنەی یەکەمین ساڵڕۆژی شەهیدبوونی ژینا ئەمینی و سەرهەڵدانی شۆڕشی ” ژن ژیان ئازادیی”، لە ناوچە جیاوازەکانی ڕۆژئاوای کوردستان بە پێشەنگایەتی ژنان چەندین چالاکی و خۆپیشاندان ئەنجام درا.

 

دوێنێ لە یەکەمین ساڵڕۆژی شەهیدبوونی ژینا ئەمینی و سەرهەڵدانی شۆڕشی “ژن ژیان ئازادیی” لە هەر یەک لە ناوچەکانی کۆبانێ، تەبقا، قامیشلۆ، دێرک، عامودا، حەسەکە، تل تەمر، حەلەب، ڕەقە، منبج و سەرانسەری باکوور و ڕۆژهەڵاتی سوریا بە هەزاران ژن ڕژانە سەر شەقامەکان و چەندین چالاکیی جۆراوجۆر ئەنجام درا.

دوێنێ لە گۆڕەپانی ژنی ئازاد لە کۆبانێ، بە پێشەنگایەتی یەکێتیی ژنانی گەنجی هەرێمی فورات، بە بۆنەی ساڵیادی شەهیدبوونی ژینا ئەمینی لەلایەن پۆلیسی ئێران و دەسپێکردنی شۆڕش لە ڕۆژهەڵاتی کوردستان و ئێران، شانۆییەک ئەنجام درا.

هەروەها هەر دوێنی و بۆ بەبیرهێنانەوەی شەهیدبوونی ژینا ئەمینی، ئەنجوومەنی ژنانی تەبقا، قامیشلۆ، دێرک وعامودا، ساڵڕۆژی شۆڕشی (ژن، ژیان، ئازادیی) خۆپیشاندان و چالاکی جیاوازیان ئەنجام دا.

هەر لە درێژەی چالاکیی و یادکردنەوەکانی سەرهەڵدانی شۆڕشی “ژن، ژیان، ئازادیی”ـدا دوێنێ، لە حەسەکە، تل تەمر، حەلەب، ڕەقە، تەبقا، منبج و سەرانسەری باکوور و ڕۆژهەڵاتی سووریا، هەزاران ژن هاتنە گۆڕەپانەکان و چالاکییان ئەنجام دا.

ب. ق

Comments are closed.